విటమిన్ సి.. దీన్నే ఆస్కార్బిక్ యాసిడ్ అని కూడా పిలుస్తారు. ఇది నీటిలో కరిగే విటమిన్. విటమిస్ సి లోపిస్తే స్కర్వీ వ్యాధి వస్తుంది. దీని వల్ల తీవ్రమైన నీరసం, అలసట, రక్తహీనత, శ్వాస తీసుకోవడంలో ఇబ్బందులు, గాయాలు త్వరగా మానకపోవడం, డిప్రెషన్ వంటి సమస్యలు వస్తాయి. అలాగే శరీర రోగ నిరోధక శక్తి తగ్గుతుంది. చిగుళ్ల నుంచి రక్తం కారుతుంది. దంత సమస్యలు వస్తాయి. అయితే మన శరీరం విటమిన్ సి ని తయారు చేసుకోలేదు. కనుక నిత్యం ఆహారం ద్వారా మనకు ఆ విటమిన్ అందేలా చూసుకోవాలి.
విటమిన్ సి అనేక రకాల పండ్లు, కూరగాయల్లో మనకు లభిస్తుంది. కరోనా నేపథ్యంలో చాలా మంది తమ శరీర రోగ నిరోధక శక్తిని పెంచుకునేందుకు విటమిన్ సి ఉన్న ఆహారాలతోపాటు మల్టీ విటమిన్ ట్యాబ్లెట్లను కూడా తీసుకుంటున్నారు. అయితే నిజానికి విటమిన్ సి మన శరీర రోగ నిరోధక శక్తిని పెంచడంలో ఎంతగానో దోహదపడుతుంది. దీని వల్ల ఇన్ఫెక్షన్లు రాకుండా ఉంటాయి. అనారోగ్యాల బారిన పడే అవకాశం తక్కువగా ఉంటుందని వైద్య నిపుణులు చెబుతున్నారు.
విటమిన్ సి మన శరీరంలో టి-సెల్స్ను నిర్మిస్తుంది. వాటి దృఢత్వానికి విటమిన్ సి అవసరం. ఈ సెల్స్ శరీర కణజాలాన్ని రక్షిస్తాయి. అలాగే శరీరంలోని కణాలను ఆరోగ్యకరంగా ఉంచేందుకు, ఇన్ఫెక్షన్ల బారిన పడకుండా చూసేందుకు విటమిన్ సి అవసరం. విటమిన్ సి మన శరీరంలో రోగ నిరోధక శక్తి కణాలను ఎక్కువగా ఉత్పత్తి చేస్తుంది. దీని వల్ల మనం ఇన్ఫెక్షన్ల బారిన పడకుండా ఉంటాం. అలాగే అనారోగ్య సమస్యలకు గురయ్యే అవకాశాలు తక్కువగా ఉంటాయి. విటమిన్ సి వల్ల దగ్గు, జలుబు, ఇతర శ్వాసకోశ సమస్యలు రాకుండా ఉంటాయి. కనుక విటమిన్ సి ఉండే ఆహారాలను నిత్యం తీసుకోవాలి. దీని వల్ల కరోనా నుంచి కూడా కొంత వరకు రక్షణ లభిస్తుంది.
విటమిన్ సి నిత్యం ఎవరెవరికి ఎంత కావాలంటే..
* 0 – 6 నెలల వయస్సు – 40 మిల్లీ గ్రాములు
* 7 – 12 నెలల వయస్సు – 50 మిల్లీ గ్రాములు
* 1-3 ఏళ్లు – 15 మిల్లీగ్రాములు
* 4-8 ఏళ్లు – 25 మిల్లీగ్రాములు
* 9-13 ఏళ్లు – 45 మిల్లీగ్రాములు
* 14 – 18 ఏళ్లు – పురుషులు 75 మిల్లీగ్రాములు – స్త్రీలు 65 మిల్లీగ్రాములు
* 19 ఏళ్లకు పైబడిన వారు – పురుషులు 90 మిల్లీగ్రాములు – స్త్రీలు 75 మిల్లీగ్రాములు
* గర్భిణీలు – 85 మిల్లీగ్రాములు
* పాలిచ్చే తల్లులు – 120 మిల్లీగ్రాములు
* పొగ తాగేవారు పైన తెలిపిన మొత్తం కన్నా అదనంగా మరో 35 మిల్లీగ్రాముల విటమిన్ సిని నిత్యం తీసుకోవాలి.
విటమిన్ సి మనకు ఆరెంజ్లు, నిమ్మకాయలు, ఉసిరి, బత్తాయి, గ్రేప్ ఫ్రూట్స్, స్ట్రాబెర్రీలు, కివీలు, బ్రొకొలి, బ్రస్సెల్స్ స్ప్రౌట్స్, పాలకూర, కాలే, రెడ్ అండ్ గ్రీన్ పెప్పర్స్, బంగాళాదుంపల్లో లభిస్తుంది.