డేవిడ్ స్టీఫెన్ యంగ్‌కు కాస్త మందు ఎక్కువ అయింది. దానికి అతను చెల్లించిన మూల్యం 16 వేల డాలర్లు. తర్వాత ఇంకా చెల్లించాల్సి వచ్చినా ఆశ్చర్యం లేదు.
44 ఏళ్ల యంగ్ జనవరి నాలుగున కెనడాలోని కాల్గరీ నగరం నుంచి లండన్ వెళ్లే వెస్ట్‌జెట్ విమానంలో ఎక్కాడు. దానికి ముందు వరసగా ఆరు రౌండ్లు మద్యం తాగాడు. తాగింది తలకెక్కింది. టేకాఫ్ సమయంలో టాయ్‌లెట్‌కు వెళ్లేందుకు ప్రయత్నించాడు. సిబ్బంది అడ్డుకున్నారు. యంగ్ దురుసుగా ప్రవర్తించాడు. ఈ లోపు విమానం గాల్లోకి లేచింది. యంగ్ వీరంగం మాత్రం ఆగలేదు. అతని గొడవ చూసి ప్రయాణీకులు భయభ్రాంతులయ్యారు.
తప్పనిసరి పరిస్థితుల్లో విమానం పైలట్ వెనక్కు వెళ్లాలని నిర్ణయించాడు. విమానం పొట్ట నిండా ఉన్న ఇంధనం ఉన్న కారణంగా కాల్గరీలో తిరిగి సురక్షింతంగా ల్యాండ్ అవ్వడం కుదరదు. చేసేది లేక పైలట్ 20 వేల టన్నుల ఇంధనం నేలపాలు చేసి విమానాన్ని దించాడని యుఎస్‌ఎ టుడే తెలిపింది.
పోలీసులు యంగ్‌ను అరెస్టు చేసి కోర్టులో నిలబెట్టారు. తప్పు చేశానని ఒప్పుకున్న యంగ్‌కు జడ్జి 16 వేల రూపాయాల జరిమానా విధించారు. ఆ డబ్బు వెస్ట్‌జెట్‌కు చెల్లించాల్సిందిగా ఆదేశించారు. నిజానికి ప్రయాణీకులకు చెల్లించాల్సిన నష్టపరిహారం కూడా కలుపుకుంటే వెస్ట్‌జెట్‌పై లక్షా 50 వేల డాలర్ల వరకూ భారం పడుతుంది. నష్టపరిహారం కోసం యంగ్‌పై సివిల్ దావా వేసుకోవచ్చని న్యాయమూర్తి సూచించారు.
