డెహ్రడూన్: ఒక వ్యక్తికి ప్రధాని నరేంద్ర మోదీపై ఉన్న అభిమానం కాస్తా ఎన్నికల సంఘం నుంచి నోటీసులు అందుకునే వరకు వెళ్ళింది. తమ ఇంట జరిగే పెళ్లికి వచ్చే ముందు తప్పకుండా మోదీకి ఓటేసి రావాలని ఆహ్వాన పత్రికపై ముద్రించినందుకు ఆ వ్యక్తి నోటీసులు అందుకున్నాడు. ఈ సంఘటన ఉత్తరాఖండ్‌లో జరిగింది.
ఉత్తరాఖండ్‌లోని జోషికోలా గ్రామానికి చెందిన జగదీష్ చంద్రజోషి అనే వ్యక్తి స్థానికంగా పశువుల పాకను నడిపిస్తున్నారు. అయితే జగదీష్ తన కుమారుడు జీవన్ వివాహం సందర్భంగా పెళ్లి పత్రికల్లో నరేంద్ర మోదీకి ఓటేయమంటూ బంధువులను అర్ధించారు.
‘పెళ్లికి మీరు ఎలాంటి బహుమానం తీసుకురాకండి. మీ ఆశీర్వాదాలు నవ దంపతులకు ఇచ్చే ముందు ఏర్పిల్ 11న మోదీకి ఓటేసి రండి’ అని వివాహ ఆహ్వాన పత్రికలో జగదీష్ ప్రింట్ చేయించారు.
దీంతో స్థానిక అసిస్టెంట్ రిటర్నింగ్ అధికారి బేగేశ్వర్ జగదీష్‌కు ఎన్నికల నియమావళిని ఉల్లగించినందుకు నోటీసులు పంపారు.
‘మాకు అందిన సమాచారం మేరకు బేగేశ్వర్ ద్వారా జగదీష్‌కు నోటీసులు పంపాం. జగదీష్‌‌ను 24 గంటల్లో తమ ముందు హాజరు కావాలని ఆ నోటీసులో పేర్కొన్నాం’ అని జిల్లా ఎన్నికల అధికారి రంజన తెలిపారు.
కాగా, ఈ వ్యవహారంపై జగదీష్ క్షమాపణలు చెప్పారు. ‘ఆహ్వాన పత్రికపై మా పిల్లలు అలా రాయించారు. దీనికి నేను క్షమాపణలు కోరుతున్నాను. మేం చాలా సాధారణ వ్యక్తులం. మేం ఏ పార్టీకి వ్యతిరేకం కాదు. ఏ పార్టీని ప్రభావితం చేయలేము’ అని జగదీష్ చెప్పుకొచ్చారు.
ఉత్తరాఖండ్‌లో ఏప్రిల్ 11న ఎన్నికలు జరగనున్నాయి. అతని వివాహం ఏప్రిల్ 22 న జరగనుంది.
అంతకు ముందు కూడా ఇలానే కొందరు ‘ వచ్చే ఎన్నికల్లో మోదీకి ఓటు వెయ్యటమే మీరు మాకు ఇచ్చే బహుమతి’ అని పెళ్లి కార్డుల్లో ప్రింట్ చేయించారు. కాకుంటే ప్రస్తుతం దేశంలో సార్వత్రిక ఎన్నికల నేపథ్యంలో ఎన్నికల నియమావళి అమలులో ఉండటంతో జగదీష్ నోటీసులు అందుకొనవలసి వచ్చింది.
