సోషల్ మీడియా దిగ్గజం ట్విట్టర్ ను కొనుగోలు చేయాలన్న డీల్ నుండి అర్ధాంతరంగా వైదొలిగి న్యాయ పోరాటంలో చిక్కకున్న ప్రపంచ కుబేరుడు, టెస్లా అధినేత ఎలాన్ మస్క్ .. నేడు సోషల్ మీడియా వేదికగా ట్విస్ట్ ట్వీట్ లు చేశారు. ప్రముఖ ఫుట్ బాల్ క్లబ్ ‘మాంచెస్టర్ యునైటెడ్’ ను కొనుగోలు చేస్తానంటూ ప్రకటించి మరోసారి గందరగోళాన్ని సృష్టించారు. అయితే ఈ డీల్ కు సంబంధించి ఎలాంటి వివరాలను వెల్లడించలేదు. “నిజం చెప్పాలంటే నేను రిపబ్లిక్ పార్టీ ఎడమ భాగాన్ని, డెమోక్రాటిక్ పార్టీ కుడి భాగాన్ని సపోర్టు చేస్తా” అని ట్వీట్ చేసిన ఎలాన్ మస్క్ ఆ వెంటనే “నేను మాంచెస్టర్ యూనైటెడ్ ను కూడా కొంటున్నా, మీ అందరికీ స్వాగతం” అని మరో ట్వీట్ చేశారు.
అయితే ఇలాంటి ట్వీట్ల విషయంలో మస్క్ వైఖరి ఏమిటో స్పష్టంగా తెలియనప్పటికీ ఈ వార్త ఫుట్ బాల్ వర్గాల్లో హాట్ టాపిక్ అయ్యింది. ట్విట్టర్ కొనుగోలు అంశంలో సంచలనాలు సృష్టించిన చరిత్ర మస్క్ కు ఉండటంతో వెంటనే దీనిని నమ్మలేని పరిస్థితి విశ్లేషకుల్లో నెలకొంది. మస్క్ ట్వీట్ ల అనంతరం మాంచెస్టర్ యునైటెడ్ యజమాని అయిన గ్లోజెర్స్ ఫ్యామిలీని, మస్క్ ను వార్తా సంస్థలు సంప్రదించగా ఎలాంటి స్పందన రాలేదు. అయితే కొద్ది గంటల వ్యవధిలోనే మస్క్ మళ్లీ స్పందిస్తూ .. అబ్బే లేదు.. ట్విట్టర్ లో అత్యధిక కాలం ఉండే జోక్ ఇది.. నేను ఎటువంటి క్రీడా జట్టును కొనుగోలు చేయడం లేదు అని వివరణ ఇచ్చారు.
గ్లోజెర్స్ ఫ్యామిలీ గత ఏడాది నుండి ఈ పుట్ బాల్ జట్టును అమ్మాలని భావిస్తున్నట్లు వార్తలు వచ్చాయి. కానీ నాలుగు బిలియన్ పౌండ్ల కంటే అధిక మొత్తంలో ఆఫర్ వస్తేనే అమ్మకానికి సిద్ధంగా ఉంది. ఈ ఫుట్ బాల్ జట్టు ఏకంగా 20సార్లు ఇంగ్లాండ్ ఛాంపియన్ గా నిలిచి రికార్డు సృష్టించింది. మూడు సార్లు యూరోపియన్ కప్ ను గెలుచుకుంది. ఈ క్లబ్ మార్కెట్ విలువ మంగళవారం నాటికి 2.08 బిలియన్ డాలర్లుగా ఉంది. అయితే ఇటీవల క్లబ్ ఆట తీరు కొంత నిరాశజనకంగా ఉండటంతో గ్లోజెర్స్ కు వ్యతిరేకంగా అభిమానులు ఆందోళనలు చేస్తున్నారు. ఈ క్రమంలోనే కొందరు అభిమానులు ఎలాన్ మస్క్ ట్విట్టర్ కు బదులు ఈ క్లబ్ కొనాలని కోరారు. ఈ నేపథ్యంలోనే మస్క్ క్లబ్ కొనుగోలు చేస్తానంటూ ట్వీట్ చేయడంతో అభిమానులు సంతోషాన్ని వ్యక్తం చేసే లోపుగానే జోక్ చేశానంటూ మస్క్ బిగ్ ట్విస్ట్ ఇచ్చారు.