ఓ అధ్యయనంలో పిల్లల చిన్నప్పుడు వారి తల్లిదండ్రుల మధ్య గొడవలు, గృహ హింస, కన్నవాళ్లు విడిపోవడం లాంటి చేదు అనుభవాలను ఎదుర్కొంటే ఆ ప్రభావం పిల్లలపై దీర్ఘకాలం ఉంటుందని తేలింది. ఇంకొక విషయం ఏమంటే చిన్నప్పుడు వారు ఎదురుకున్న చేదు అనుభవాల ప్రభావం వాళ్ళ పిల్లలమీద కూడా ఉంటుందని నిపుణులు అంటున్నారు.
ఈ అధ్యయన ఫలితాలు పీడియాట్రిక్స్ జర్నల్‌లో ప్రచురింపబడ్డాయి. పిల్లలు తమ బాల్యంలో నాలుగుసార్ల కన్నా ఎక్కువగా ఇలాంటి కుటుంబంలో ఒత్తిళ్లు ఎదురుకుంటే అటువంటి పిల్లలకు అటెన్షన్ డెఫిషిట్ హైపర్‌యాక్టీవ్ డిసార్డర్ రిస్క్ ఎక్కువ అని అధ్యయనాలు చెబుతున్నాయి. అలా నాలుగుసార్లు ఇటువంటి సమస్యలు ఎదురుకున్న పిల్లలకి మానసిక సమస్యలు తప్పవంటున్నారు నిపుణులు.
దీనికోసం యూఎస్ నేషనల్ సర్వే వారి దగ్గరున్న నాలుగు తరాల కుటుంబాల సమాచారాన్ని పరిశీలించి అధ్యయనం చేశారు. పిల్లల్ని బాల్యంలో తల్లిదండ్రులు నిర్లక్ష్యం చేయడం, ఒత్తిళ్లకు గురిచేయడం, మందలించడం, హింసించడం లాంటివి చేసినట్లు అయితే ఆ ప్రభావం పిల్లలపై భవిష్యత్తులో ఎలా ఉంది? అన్న అంశాలపై అధ్యయనం జరిపారు.
తల్లిదండ్రులు విడాకులు తీసుకోవడం, విడిపోవడం, ఎవరో ఒకరు చనిపోవడం, మానసిక, శారీరక, లైంగిక వేధింపులు, గృహహింసను ప్రత్యక్షంగా చూడటం లాంటి అంశాలను ఎదురుకున్న పిల్లలపై ఆ ప్రభావం ఎంతవరకు ఉందో వారు పరిశీలించారు. అయితే ఈ అధ్యయనం లో తేలింది ఏమనగా బాల్యంలో తండ్రి ఎదుర్కొన్న కష్టాలకన్నా తల్లి ఎదుర్కొన్న సమస్యల ప్రభావమే పిల్లలపై ఎక్కువగా ఉందట. చిన్నప్పటి నుంచి అమ్మ కష్టాలను చూస్తూ పెరిగిన పిల్లలకు మానసిక సమస్యలు ఎక్కువగా ఉన్నాయట.
