క‌రోనా నేప‌థ్యంలో ప్ర‌స్తుతం సోష‌ల్ మీడియాలో ఇబ్బ‌డిముబ్బ‌డిగా ఫేక్ వార్త‌లు ప్ర‌చారం అవుతున్నాయి. ఫ‌లానా ప‌నిచేస్తే క‌రోనా రాద‌నో.. ఫ‌లానా పానీయం తీసుకుంటే కోవిడ్‌కు అడ్డుక‌ట్ట వేయ‌వ‌చ్చ‌నో.. ఫేక్ వార్త‌ల్లో చెబుతున్నారు. వాటిని జ‌నాలు కూడా నిజ‌మేన‌ని న‌మ్ముతున్నారు. ఇక తాజాగా ఇలాంటిదే మ‌రొక ఫేక్ వార్త ప్ర‌చార‌మ‌వుతోంది. కోవిడ్ 19 రాకుండా ఉండాలంటే వోడ్కా తాగాల‌ని అందులో ఉంది.
వోడ్కా అనేది నిజానికి మ‌ద్యంలో ఒక వెరైటీ. బ్రాందీ, విస్కీ, బీర్‌లాగే ఇది కూడా మ‌ద్యంలో ఒక ర‌కం. ఇందులోనూ ఆల్క‌హాల్ ఉంటుంది. కాక‌పోతే రుచి భిన్నంగా ఉంటుంది. అయితే ఆల్క‌హాల్ ఉంటుంద‌ని చెప్పి కోవిడ్ 19ను వోడ్కా అడ్డుకుంటుంద‌ని కొంద‌రు ప్ర‌స్తుతం సోష‌ల్ మీడియాలో ప్ర‌చారం చేస్తున్నారు. ఇక అమెరికాలోని సెయింట్ లూక్స్ అనే హాస్పిట‌ల్ ఇదే విష‌యాన్ని చెబుతుంద‌ని, అంద‌రూ వోడ్కా తాగాల‌ని సూచిస్తుంద‌ని.. ఆ హాస్పిట‌ల్ పేరిట ఓ లేఖ‌ను కూడా కొంద‌రు ప్ర‌చారం చేస్తున్నారు.
అయితే ఇందులో ఎంత‌మాత్రం నిజం లేద‌ని వెల్ల‌డైంది. స‌ద‌రు హాస్పిట‌ల్ యాజ‌మాన్యం తామేమీ అలాంటి లేఖ‌ను విడుద‌ల చేయ‌లేద‌ని స్ప‌ష్టం చేసింది. ఆ వార్త‌ల‌న్నీ ఫేక్ అని నిర్దారించింది. పైగా అందులో ఉన్న‌ట్లు వోడ్కా సేవిస్తే కోవిడ్ 19 రాద‌ని ఎవ‌రూ అనుకోకూడ‌ద‌ని, ఆల్క‌హాల్ కోవిడ్‌ను చంపే మాట వాస్త‌వ‌మే అయినా.. దాన్ని హ్యాండ్ శానిటైజ‌ర్ లేదా సోప్ రూపంలో వాడాల‌ని.. అంతేకానీ మ‌ద్యం రూపంలో లోపలికి తీసుకుంటే కోవిడ్ రాకుండా అడ్డుకోలేద‌ని.. తేల్చారు. క‌నుక ఇలాంటి వార్త‌ల‌ను న‌మ్మి ఎవ‌రూ ప్రాణాల మీద‌కు తెచ్చుకోవ‌ద్ద‌ని ఆ హాస్పిట‌ల్ హెచ్చ‌రించింది.
