Father and Son: మహారాష్ట్రలోని నందుర్బార్ కు చెందిన యోగ్ పంజరాలే తన తండ్రి అర్ధరాత్రి పూట నిద్ర లేకుండా వెళ్లి పంట పొలం దగ్గర సమయం గడపడం చూసి తట్టుకోలేకపోయాడు. వారి ప్రాంతంలో విద్యుత్తు కేవలం రాత్రి పూట మాత్రమే నిరంతరాయంగా అందుబాటులో ఉంటుంది. ఇక వ్యవసాయం అనేది 24×7 ఉండే పని. పంటలకు నీరు ఎల్లప్పుడూ కావాలి కాబట్టి అతని తండ్రి వారానికి మూడు రోజులు రాత్రంతా మేల్కొని ఆరు కిలోమీటర్ల దూరంలో ఉన్న తన పొలానికి వెళ్లి మోటర్ స్విచ్ ఆన్ చేసి ఇస్తాడు.
కరోనా చేసిన మంచి…
అయితే కరోనా లాక్ డౌన్ సమయంలో తన తండ్రి అయిన సూర్యకాంత్ కష్టానికి స్వస్తి పలికే అవకాశం కొడుకు కు వచ్చింది. లాక్ డౌన్ సమయంలో ఇంట్లో ఉండే ఖాళీ సమయంలో కోడింగ్ క్లాసులు నేర్చుకొని కోర్సు పూర్తి చేశాడు యోగ్. తన తెలివితేటలతో ఒక మొబైల్ అప్లికేషన్ తో పాటు సరికొత్త పరికరాన్ని కూడా నిర్మించాడు. దాని ద్వారా తన తండ్రి ఇంటిలో నుంచి బయటికి వెళ్లకుండా ఎక్కడో 6 కిలోమీటర్ల దూరంలో ఉన్న మోటార్ స్విచ్ ఆటోమేటిక్ గా చేసే టెక్నాలజీ రూపొందించాడు.
రిస్క్ లేని యాప్
ఇంకేముంది… మొబైల్ అప్లికేషన్ లోని సెల్ నెట్ వర్క్ ద్వారా తన చేతిలో ఉండే ఫోన్ నుండే పొలానికి నీళ్లు అందించడం… ఆపివేయడం సూర్యకాంత్ కు సులువుగా చేశాడు. తన తండ్రి మోటార్ స్విచ్ వేసి వచ్చేందుకే గంట సమయం పడుతుంది. ఈ లోపల ఇంట్లో వారు అతనికి పాముల నుండి ఇతర జంతువులనుండి ఎక్కడ హాని జరుగుతుందో అని భయపడుతూ ఉండేవారు.
Father and Son: ప్రతిదీ లాభదాయకమే…
అంతే కాకుండా ఒక్కోసారి స్విచ్ ఆన్ చేసి వచ్చిన తండ్రి మళ్ళీ ఆపేందుకు వెళ్ళలేకపోయేవాడు. దాంతో ఎన్నో లీటర్ల వందల లీటర్ల మంచి నీరు వృధాగా పోతుంది. ఇప్పుడైతే ఈ మొబైల్ అప్లికేషన్ ద్వారా మోటర్ ఇష్టం వచ్చినప్పుడు వేయవచ్చు… ఆపివేయవచ్చు. అలాగే టైమింగ్ కూడా షెడ్యూల్ చేయవచ్చు. మోటార్ రూమ్ లోని లైట్స్ కూడా కంట్రోల్ చేయవచ్చు.
ఈ అధునాతన ఎలక్ట్రానిక్ పరికరం నిర్మించేందుకు యోగ్ కేవలం నాలుగు వేల రూపాయలు మాత్రమే ఖర్చు పెట్టాడు. దాని తర్వాత ఒక అప్లికేషన్ కోడింగ్ చేసి దాని ద్వారా వ్యవసాయం చేసే తన తండ్రికి ఆపద్బాంధవుడు అయ్యాడు.