కర్నూలు జిల్లా శిరివెళ్ల మండలం ఎర్రగుంట్ల సమీపంలో మంగళవారం తెల్లవారుజామున ఘోర రోడ్డు ప్రమాదం జరిగింది. ఈ ప్రమాదంలో నలుగురు చిన్నారులు మృతి చెందగా, మరో ఎనిమిది మంది తీవ్రంగా గాయపడ్డారు. ఎర్రగుంట్ల గ్రామానికి చెందిన 40 మంది ఓ అధ్యాత్మిక కార్యక్రమంలో పాల్గొనేందుకు ఈ రోజు తెల్లవారుజామున చిత్తూరు జాతీయ రహదారిపై నడుచుకుంటూ వెళుతుండగా లారీ ఢీ కొట్టి ఆగకుండా వెళ్లిపోయింది.
ఈ ప్రమాదంలో ఝాన్సీ (15), సుస్మిత (15), హర్షవర్థన్ (10), వంశీ (10)లు మృతి చెందారు. క్షతగాత్రులను నంద్యాల ప్రభుత్వ ఆసుపత్రికి తరలించారు. ప్రమాదానికి కారణమైన లారీ డ్రైవర్ వాహనాన్ని ఆపకుండా ముందుకు వెళ్లడంతో స్థానికులు వెంబడించి ఆళ్లగడ్డ సమీపంలోని బత్తులూరు వద్ద పట్టుకుని పోలీసులకు అప్పగించారు. బాధితుల బంధువులు ఆర్తనాధాలు నంద్యాల ఆసుపత్రి ప్రాంగణం మిన్నంటాయి. పోలీసులు కేసు నమోదు చేసి దర్యాప్తు చేస్తున్నారు. గ్రామానికి చెందిన నలుగురు చిన్నారులు రోడ్డు ప్రమాదంలో మృతి చెందడంతో ఎర్రగుంట్లలో విషాదశ్ఛాయలు అలుముకున్నాయి.
