good bacteria: బాక్టీరియా అంటే వాటితో మనకు అనారోగ్య సమస్యలు వస్తాయని చాలా మంది భావిస్తుంటారు. కానీ వాస్తవానికి మనకు మంచి చేసే బాక్టీరియా కూడా ఉంటుంది. బాక్టీరియా, వైరస్లు, ఇతర సూక్ష్మ క్రిముల వల్ల మనకు వ్యాధులు వస్తాయని అందరికీ తెలిసిందే. వాస్తవానికి మంచి చేసే బాక్టీరియా మన శరీరంలో జీర్ణాశయం, పేగుల్లో ఉంటుంది. ఆ బాక్టీరియా కారణంగానే మనం తీసుకునే ఆహారం సక్రమంగా జీర్ణమవుతుంది. అదే విధంగా క్యాన్సర్, గుండె జబ్బులు రాకుండా చూడడంలో, కీళ్ల నొప్పులను తగ్గించడంలో, శరీర రోగ నిరోధక శక్తిని పెంచడంలో కూడా మంచి బాక్టీరియా మనకు ఎంతగానో మేలు చేస్తుందని వైద్యులు చెబుతుంటారు. మంచి బాక్టీరియాను మన శరీరంలో ఎలా పెంచుకోవాలి, అందుకు ఎటువంటి ఆహారం తీసుకోవాలి అనే విషయాలు ఇప్పుడు తెలుసుకుందాం.
ప్రొ బయోటిక్స్
ప్రొ బయోటిక్స్ అధికంగా ఉండే పాలు, పాల ఉత్పత్తులు, పప్పులు, సోయా ఉత్పత్తులు తదితర ఆహారాలను ఎక్కువగా తీసుకుంటే మన శరీరంలో మంచి బాక్టీరియా వృద్ధి చెందుతుంది. దీని వల్ల మనం తిన్న ఆహారంలో ఉండే పోషకాలను శరీరం సులభంగా తీసుకుంటుంది. అదే విధంగా చెడు బాక్టీరియా నశిస్తుంది.
ఫైబర్
ఫైబర్ (పీచు పదార్థం) ఎక్కువగా ఉండే తాజా ఆకు కూరలు, కూరగాయలు, పండ్లు తదితర ఆహారాలను రోజు తీసుకుంటే కూడా మంచి బాక్టీరియా పెరుగుతుంది. దీంతో అనారోగ్య సమస్యలు రాకుండా ఉండటంతో పాటు శరీరంలో నిరోధక శక్తి పెరుగుతుంది.
షుగర్
మన శరీరంలో మంచి బాక్టీరియాను పెంచుకోవాలంటే చక్కెరను చాలా తక్కువగా తీసుకోవాలి. సాధ్యమైనంత వరకూ పూర్తిగా మానివేస్తే ఇంకా మంచిది. చక్కర వల్ల మన శరీరంలో మంచి బాక్టీరియా నశించడమే కాకుండా చెడు బాక్టీరియా పెరుగుతుంది. ఫలితంగా బాక్టీరియా, వైరస్, ఫంగస్ ఇన్ఫెక్షన్లు వచ్చే అవకాశం ఉంటుంది.
బురద
ప్రకృతి వైద్యంలో బురదతో చికిత్స ఉంటుంది. ఎందు కంటే బురదలో మన శరీరానికి మేలు చేసే బాక్టీరియా ఉంటుంది. అందుకని వీలు కుదిరినప్పుడల్లా బురదను ఒంటికి రాసుకుని తడి ఆరిపోయాక స్నానం చేస్తే చాలు. లేదంటే మట్టిలో కాసేపు ఆటలాడినా మన శరీరంలో మంచి బాక్టీరియా పెరుగుతుంది.
నిద్ర
మంచి బాక్టీరియా పెరిగేందుకు నిత్యం కనీసం 7 నుంచి 9 గంటల పాటు కచ్చితంగా నిద్ర పోవాలి. నిద్రలేమి వల్ల కూడా అనేక అనారోగ్య సమస్యలు వస్తుంటాయి. కనీసం ఏడు 8 గంటలు నిద్ర పోతే శరీరం ఉత్సాహంగా ఉంటుంది.
వ్యాయామం
రోజు పొట్టుకు సంబంధించిన వ్యాయామం చేయడం వల్ల కూడా మన శరీరంలో మంచి బాక్టీరియా పెరుగుతుంది. మన శరీరంలో అన్ని అవయవాలు సక్రమంగా పనిచేస్తాయి. రోగ నిరోధక శక్తి పెరుగుతుంది.