కన్నడ సినిమా లవ్ మాక్టైల్ (Love Mocktail)కి తెలుగులో గుర్తుందా శీతాకాలం అనే సినిమా వస్తున్న విషయం తెలిసిందే. తమన్నా, సత్యదేవ్ హీరోహీరోయిన్లుగా ఈ సినిమా రెండు సంవత్సరాల క్రితమే షూటింగ్ మొదలు పెట్టింది. ప్రస్తుతానికి చిత్రీకరణ మొత్తం పూర్తయింది. ఇక రిలీజ్ కావడమే తరువాయి అన్న దశలో ఉంది. మొదటిగా ఈ సినిమాని ఈ ఏడాది ఫిబ్రవరి నెలలో విడుదల చేయాలనుకున్నారు. ఆ తర్వాత జూన్ నెలలో రిలీజ్ చేయనున్నట్లు ప్రకటించారు. మళ్లీ పదిరోజుల తర్వాత ఏమైందో ఏమో తెలియదు కానీ ఆగస్టు 5న రిలీజ్ రిలీజ్ చేస్తామని తెలిపారు. అయితే అదే రోజున బింబిసార, సీతా రామం సినిమాలు విడుదల అవుతున్నాయని సినిమాని ఇప్పుడు కూడా విడుదల చేయడం మానుకుంది చిత్రబృందం. అయితే సినిమాను వాయిదా వేస్తున్నట్లు కూడా ప్రకటించక పోవడం గమనార్హం.
ఊరించడమే కానీ రిలీజ్ ఎప్పుడు?
గుర్తుందా శీతాకాలం సినిమా కోసం తెలుగు ప్రేక్షకులు ఎంతగానో ఎదురు చూస్తున్నారు. ఈ సినిమాలో నటించింది స్టార్ హీరో కాకపోయినా కన్నడలో ఆల్రెడీ వచ్చిన మూవీ కాబట్టి, కథ కూడా తెలుసు కాబట్టి దీనిపై అంచనాలు మంచిగానే ఉన్నాయి. కానీ సినిమా రిలీజ్ అప్పుడు… ఇప్పుడు అని మూవీ యూనిట్ ఊరిస్తోందే తప్ప రిలీజ్ మాత్రం చేయడం లేదు. దీంతో ఈ సినిమా కోసం వెయిట్ చేస్తున్న వారిలో సహనం చచ్చిపోతోంది. మరికొద్ది రోజులు లేట్ చేస్తే ఈ సినిమా వచ్చినట్లు, పోయినట్లు కూడా ఎవరూ తెలుసుకోలేరేమో.
కీలక అప్డేట్..?
ఈ సినిమాలో హీరోగా చేసిన సత్యదేవ్ కూడా గుర్తుందా శీతాకాలం గురించి సోషల్ మీడియాలో ఒక్క పోస్ట్ కూడా పెట్టడం లేదు. ఇక తమన్నా కూడా ఈ సినిమాని ప్రచారం చేయడం లేదు. ఆ విధంగా ఈ సినిమా నుంచి అధికారిక అప్డేట్స్ రాక ఈ సినిమా ఒకటి తీశారనే విషయాన్ని చాలామంది మర్చిపోతున్నారు. ఇప్పటికిప్పుడు ఒక కీలక అప్డేట్ ప్రకటించి.. ఈ సినిమా ప్రచారాన్ని జోరుగా చేయకపోతే దీనిపై అందరిలో ఆసక్తి తగ్గిపోయే ప్రమాదం ఉంది.