ఆంధ్రప్రదేశ్ లోని అనంతపురం జిల్లాలో ఓ వ్యక్తి అనివార్య కారణాల వల్ల దొంగగా మారాడు. పక్కాగా ప్లాన్ రెడీ చేసుకుని ఏటీఎం దొంగతనానికి సిద్ధపడ్డాడు.
మనోజ్ కుమార్ అనే వ్యక్తి ముక్కడిపేట లో నివసిస్తున్నాడు. అతడొక కూలి. అయితే, ఏ కారణం చేతనో తెలియదు కానీ అతను దొంగగా మారాడు. చిన్న చిన్న దొంగతనాలు చేస్తే కాలం గడుపుతున్నాడు. ఇలా కొంచెం కొంచెం డబ్బు కోసం ఇంత కష్టపడం అనవసరం అనుకుని పెద్దగా డబ్బు రావడం కోసం ఏం చెయ్యాలో ఆలోచించడం మొదలు పెట్టాడు. బాగా అలోచించి ఏటీఎం దొంగతనానికి ప్లాన్ చేసాడు.
అతడు కెడిగెనహళ్లి గ్రామంలోని ఓ ఏటీఎంను తన టార్గెట్ గా చేసుకున్నాడు. అర్ధరాత్రి దాటాక అయితే జనాలు తిరిగే ఛాన్సు చాలా తక్కువ కాబట్టి ఏటీఎంను అప్పుడు పగలగొట్టి డబ్బు తెచ్చుకుందామనుకున్నాడు. కానీ అతడి ప్రయత్నం ఫలించలేదు. వరుసగా నాలుగు రోజుల పాటు ప్రయత్నించినా ఆ ఏటీఎంను అతను తెరవలేకపోయాడు. దీంతో అతడికి చిరాకు వచ్చి దాని మీద పెట్రోల్ పోసి తగలబెట్టి ఇంటికి తిరిగివెళ్ళాడు.
మనోజ్ ఇంటికి తిరిగొచ్చాక ఆ రాత్రి ప్రశాంతంగా నిద్రపోయాడు. ఫ్రెండ్ కు ఫోన్ చేద్దామనుకుని తెల్లారి నిద్రలేచాక చూస్తే అతని ఫోన్ కనిపించలేదు. తరువాత ఆలోచిస్తే గుర్తొచ్చింది. నిన్న రాత్రి తన ఫోన్ ను ఏటీఎం మెషీన్ వద్దే మర్చిపోయినట్టు అతడికి గుర్తుకొచ్చింది.
తాను పోలీసులకు దొరికిపోవడం ఖాయమని మనోజ్ కి అర్ధం అయ్యింది. అతనికి ఒకటే పరిష్కారం తోచింది. ఎవరికీ ఏమి చెప్పకుండా తన ఇంట్లోనే ఆత్మహత్య చేసుకుని ప్రాణాలు విడిచాడు. అప్పటికే హిందూపురం పోలీసులకు ఏటీఎంను తగలబెట్టిన విషయం తెలియడంతో వారు విచారణ మొదలుపెట్టారు. ఇంతలో మనోజ్ ఆత్మహత్య గురించి కూడా వారికి సమాచారం అందడంతో వెంటనే ఘటనా స్థలానికి చేరుకొని పోలీసులు ఆ మొబైల్ మనోజ్ దేనని నిర్ధారణ చేసుకున్నారు.
