Huzurabad By Election: హూజూరాబాద్ ఉప ఎన్నికల నేపథ్యంలో తెలంగాణలో రాజకీయ వాతావరణం హీట్ ఎక్కింది. నిన్నటి వరకూ కలిసి తిరిగిన స్నేహితులే ఇప్పుడు హఠాత్తుగా ప్రత్యర్ధులుగా మారి విమర్శలు, ప్రతి విమర్శలు, ఆరోపణలు, ప్రత్యారోపణలు చేసుకుంటున్నారు. తెలంగాణ ఉద్యమ కాలం నుండి ఇటీవల కాలం వరకూ మంత్రి పదవులతో కలసి మెలసి ఉన్న ఈటల రాజేందర్, మంత్రి హరీష్ రావు ఒకరిపై ఒకరు తీవ్ర స్థాయిలో విమర్శలు చేసుకుంటున్నారు. ఇటీవల హరీష్ రావు చేసిన వ్యాఖ్యలకు మాజీ మంత్రి ఈటల రాజేందర్ ఘాటుగా స్పందించారు. ఓ మీడియా ఛానల్ కు ఇచ్చిన ఇంటర్వ్యూలో సంచలన వ్యాఖ్యలతో టీఆర్ఎస్ ప్రభుత్వానికి, హరీష్ రావు కు సవాల్ విసిరారు.
Huzurabad By Election: ఆయన ఇంకా అవమానాలు భరిస్తున్నాడు
హరీష్ రావుకు తనకు మధ్య 18 సంవత్సరాల అనుబంధం ఉందని పేర్కొన్న ఈటెల.. మరో సారి హరీష్ పై సంచలన వ్యాఖ్యలు చేశారు. హరీష్ రావు కూడా తనతో పాటు అనేక అవమానాలు ఎదుర్కొన్నాడనీ, కానీ ఇంకా ఆయన భరిస్తున్నారనీ, తాను భరించలేకే బయటకు వచ్చానని మరో సారి పేర్కొన్నారు. ఏదో ఒక రోజు టీఆర్ఎస్ కు అధిపతి అవుతానని హరీష్ పగటి కలలు కంటున్నారని సంచలన వ్యాఖ్యలు చేశారు. సీఎం కేసిఆర్ తీసుకుంటున్న నిర్ణయాలు, ఆయన విధానాలతో టీఆర్ఎస్ కనుమరుగు అవుతుందనీ, ఈ విషయం హరీష్ రావు బాగా తెలుసునని ఈటెల అన్నారు.
ఇలాంటి విమర్శలకు హరీష్ రావు దూరమేననీ, కానీ పార్టీ బాధ్యతలు అప్పగించగానే అన్నీ మరచిపోయి తనపై విమర్శలు చేస్తున్నారని ఈటల అన్నారు. మామ (కేసిఆర్) మెప్పు కోసమే హరీష్ రావు తనపై ఆరోపణలు చేస్తున్నారనీ, తన గురించి హరీష్ రావుకు బాగా తెలుసునన్నారు. ఇటీవల ఈటెలను ఉద్దేశించి హూజూరాబాద్ లో రెండు గుంటలు ఉన్న వ్యక్తికి, రెండు వందల ఎకరాలు ఉన్న వ్యక్తి మధ్య పోటీ ఇది అని హరీష్ రావు చేసిన వ్యాఖ్యలపై ఈటెల స్ట్రాంగ్ కౌంటర్ ఇచ్చారు.
తప్పు చేసినట్లు రుజువైతే కోటి చౌరస్తాలో ఉరి తీయండి
200 ఎకరాల తనకు ఇప్పుడే ఉన్నాయా అని ప్రశ్నించారు ఈటెల. 2001 లో టీఆర్ఎస్ పార్టీలో చేరే నాటికే తనకు భూములు ఉన్నాయని పేర్కొన్నారు. 2002 సమయంలో తన ఆస్తులు, 2021 లో అస్తులపై సిట్టింగ్ జడ్జి లేదా సీబీఐతో విచారణ జరిపించాలని డిమాండ్ చేశారు. తాను తప్పు చేసినట్లు రుజువు అయితే హైదరాబాద్ కోటి చౌరస్తాలో ఉరి తీయమని సవాల్ విసిరారు. అలాగే వాళ్ల అస్తులపైనా విచారణ జరిపించాలని ఈటెల డిమాండ్ చేశారు. హరీష్ రావుకీ పౌల్ట్రీ ఫామ్ ఉందన్న ఈటెల ఆయనకు ఒకటి ఉంటే తనకు పది పౌల్ట్రీ ఫామ్ లు ఉన్నాయన్నారు. రాజకీయాల్లోకి రాకముందే తనకు పౌల్ట్రీ ఫామ్ లు ఉన్న విషయాన్ని ఈటెల గుర్తు చేశారు
