(న్యూస్ ఆర్బిట్ స్పెషల్ బ్యూరో)
పోరాడదాం… నిలుద్దాం అన్న నినాదంతో బరిలోకి దిగిన సన్రైజర్స్ హైదరాబాద్ తను అనుకున్న లక్ష్యాన్ని చేరుకుంది. మంగళవారం ముంబై తో జరిగిన మ్యాచ్ లో అద్భుతమైన విజయాన్ని సాధించింది. ఒక వికెట్ పడకుండా లక్ష్యాన్ని సాధించడంలో హైదరాబాద్ ఓపెనర్లు విజయం సాధించారు. మంచి రన్ రేట్ సాధించి పాయింట్స్ టేబుల్లో బెంగళూరు కంటే ముందుకు వెళ్లారు. మూడో స్థానంలోకి వెళ్లిన హైదరాబాద్ నాకౌట్ లో 6 వ తేదీన బెంగళూరుతో తలపడనుంది.
బౌలింగ్, బాటింగ్ లో సూపర్ !!
ముంబై లాంటి గట్టి టీం ను ఎదుర్కొంటున్న సమయంలో హైదరాబాద్ ఎక్కడా తడబడలేదు. ఇటు బౌలింగ్లోనూ అటు బ్యాటింగ్లో నిలకడగా రాణించి అద్భుతమైన విజయాన్ని సొంతం చేసుకుంది. ఓపెనర్ గా వచ్చిన రోహిత్ శర్మ ను త్వరగానే అవుట్ చేసిన మరో ఓపెనర్ డికాక్ మాత్రం చెలరేగి ఆడాడు. తర్వాత సూర్యకుమార్, కిషన్ స్కోర్ పెంచే బాధ్యత తీసుకున్నా వరుసగా 3 వికెట్లు పడటంతో ముంబై ఒత్తిడిలోకి వెళ్ళింది. చివర్లో పోలార్డ్ మెరుపులతో ముంబై 150 పరుగుల మార్కును దాటింది. పొలార్డ్ హైదరాబాద్ బౌలర్ నటరాజన్ చివరి ఓవర్లో వరుసగా 3 సిక్స్ లు బాదడం తో ముంబై గౌరవ ప్రదమైన స్కోర్ సాధించగలిగింది. బేర్ స్టో లాంటి హిట్టర్ ను పక్కన పెట్టి యువకుడు వృధామన్ సహా కు ఇచ్చిన అవకాశం అతడు 100 శాతం చక్కగా సద్వినియొగం చేసుకున్నాడు. కీలక మ్యాచ్ లో బేర్ స్టో లేకున్నా హైదరాబాద్ గెలవడంలో వృధామన్ కృషి ఎక్కువ ఉంది. హైదరాబాద్ కెప్టెన్ గా వార్నర్ తన 100 శాతం పట్టుదల ను, ఆటను ఇవ్వడం హైదరాబాద్ కు కలిసి వచ్చే విషయం.
11 మ్యాచ్ లలో 4 విజయాలతో
రేసును ఎవరైనా అద్భుతంగా మొదలు పెట్ట గలరు. దాన్ని విజయవంతం గా ముగించిన వాడినే విజేత అంటారు. హైదరాబాద్ కథ ఇలాంటిదే. ఆడాల్సిన 14 మ్యాచ్ లలో 11 పూర్తి అయినా కేవలం 4 విజయాలతో పాయింట్స్ టేబుల్లో చివరి వరకు వెళ్లిన సన్ రైజర్స్ హైదరాబాద్ చివరి మాచ్ లలో చేసిన పోరాటం ఉన్నతంగా నిలిపింది. ప్లే ఆఫ్ వరకు చేర్చింది. ఇతర టీమ్ ల బలహీనత కలిసి వచ్చింది. చివరి సమయంలో సమష్టి కృషి తో వారు సాగించిన విజయ యాత్ర ద్వారా ఒక మంచి సందేశం పంపినట్లు అయ్యింది. ఇక ప్లే ఆఫ్ సమయంలో ఎలాంటి మ్యాచ్ లు ఎదురు అవుతాయో, వింతలు జరుగుతాయో వేచి చూడాల్సిందే.