IPS : ఆమె ఒక ఐపీఎస్ ఆఫీసర్. సమాజంలో మహిళలకు అన్యాయం జరిగితే వారికి న్యాయంచేసే అధికారం చేతిలో ఉన్న వ్యక్తి.
కానీ ఆమెకే అన్యాయం జరిగితే ఎవరికి చెప్పుకుంటుంది.సాధారణ మహిళలా అత్తమామలు, భర్త పెట్టే కష్టాలను భరించింది. సగటు భారతీయ స్త్రీలాగా, కుటుంబ గౌరవం కోసం, తాళి కట్టి, అగ్ని సాక్షిగా ఏడడుగులు నడిచిన భర్త కోసం తన కాపురం నిలబడాలని అన్నీ భరించింది. సహనం కోల్పోయిన ఆమె చివరికి బెంగుళూరులోని కబ్బన్ పార్క్ పోలీసు స్టేషన్ లో ఫిర్యాదు చేసింది.
IPS : ఇదీ ఆ పోలీస్ అధికారిణి దయనీయ గాథ!
ఉత్తర ప్రదేశ్ కు చెందిన 2009 బ్యాచ్ ఐపీఎస్ అధికారిణి వర్తికా కటియార్(34) బెంగుళూరు పోలీసు ప్రధాన కార్యాలయంలోని కెఎస్ఆర్పి రీసెర్చ్ సెంటర్లో సూపరింటెండెంట్గా పని చేస్తున్నారు. ఆమెకు 2011 లో ఐఎఫ్ఎస్ అధికారి నితిన్ సుభాష్ యోలా తో మహారాష్ట్రలోని భుసావల్ లో వివాహం అయ్యింది.భర్త ఢిల్లీలోని దేశాంగ మంత్రిత్వ శాఖలో డిప్యూటీ సెక్రటరీగా పనిచేస్తున్నారు. తన భర్త నితిన్, అతని కుటుంబం చేతిలో సంవత్సరాల తరబడి ఆర్థిక, మానసిక, శారీరక వేధింపులకు గురయ్యానని ఆరోపిస్తూ ఫిబ్రవరి 1వ తేదీన ఆమె కబ్బన్ పార్క్ పోలీస్ స్టేషన్లో ఎఫ్ఐఆర్ ను నమోదు చేశారు.
IPS : ధన పిశాచులు వాళ్లు!
2011 లో తమ వివాహం జరిగిందని.. పెళ్లి సమయంలో ఖర్చులన్నీ తన కుటుంబమే భరించిందని ఆమె తెలిపారు. అయితే, పెళ్లి అయిన తర్వాత నుంచి బంగారు ఆభరణాలు కావాలని.. అదనపు కట్నం కావాలని డిమాండ్ చేస్తూ ….తనను అత్యంత దారుణంగా మానసికంగా, శారీరకంగా నితిన్, అతని కుటుంబ సభ్యులు వేధింపులకు గురి చేశారని ఫిర్యాదులో పేర్కొన్నారు.పెళ్లి అయ్యినప్పటి నుంచి ఇప్పటి వరకూ అనేకసార్లు తన పుట్టింటి నుంచి లక్షలాది రూపాయలను అదనపు కట్నంగా డిమాండ్ చేసి తీసుకున్నారని ఆమె వివరించారు. పెళ్లి జరిగిన మూడు నెలల్లోపే రూ.3 లక్షలు అదనంగా ఇవ్వకపొతే మీ అమ్మాయిని వదిలేస్తానని తన తల్లిదండ్రులను బెదిరించి మరీ డబ్బులు తీసుకున్నారని వర్తికా తెలిపారు.తనను అల్లుడు ఎక్కడ వదిలేస్తాడో అనే భయంతో, తన కాపురం బాగుండాలని…భర్త, నితిన్ కుటుంబ సభ్యులు అడిగిన డిమాండ్స్ ను తన తల్లితండ్రులు తీరుస్తూ వస్తున్నారని ఆమె ఫిర్యాదులో తెలిపారు. అంతేకాదు 2012 లో ఉత్తర ప్రదేశ్ లోని తన అమ్మమ్మ ఇంటికి వెళ్లి అక్కడ డబ్బులు డిమాండ్ చేస్తే వారు రూ. 5లక్షల రూపాయలను చెక్ రూపంలో ఇచ్చారని తెలిపారు వర్తిక. ఇంటి కొనుగోలు కోసం రూ.35 లక్షలు తీసుకున్నారని….డబ్బు కోసం మానసికంగా, శారీరకంగా, తనను హింసించారని ఆ ఫిర్యాలో పేర్కొంది.
భర్త హింసలు అన్నీ ఇన్నీకాదట!
2016 లో కొలంబో పర్యటనకు వెళ్లిన సమయంలో తన భర్త నితిన్ తనను కొడితే అప్పుడు చేయి కూడా విరిగిందని ఆరోపించారు. ఒక ఏడాది దీపావళి కానుక ఇవ్వలేదని విడాకులిస్తానని బెదిరించాడని ఆమె తెలిపారు. తాను గర్భవతి గా ఉన్న సమయంలో కూడా శారీరకంగా హి౦సించడం మానలేదని ఆవేదన వ్యక్తం చేశారు. ఈ కేసులో కర్ణాటక ఐఎఫ్ఎస్ అధికారి భర్త నితిన్ కాకుండా మరో ఆరుగురు కుటుంబ సభ్యులను సహ నిందితులుగా వర్తికా పేర్కొన్నారు. అతని తండ్రి సుభాష్ యెయోలా, తల్లి అమోల్ యెయోలా, బంధువులు సునీతా యోలా, సచిన్ యెయోలా, ప్రజక్త యోలా, ప్రద్న్య యోలా నిందితులుగా పేర్కొన్నారు.వర్తికా ఫిర్యాదుతో వరకట్నం నిషేధ చట్టం యొక్క సెక్షన్ 3, 4 .. ఐపీసీ లోని 498A, 506, 509,34, 384,420. 326, సెక్షన్ల కింద ఆ ఏడుగురిపై కేసు నమోదు చేశారు.