Kappa Variant: భారత దేశంలో ప్రస్తుతం అందరికీ డెల్టా భయం పట్టుకుంది. అయితే దీంతో పాటు మరొక కొత్త వేరియంట్ కూడా ఇప్పుడు వెలుగులోకి వచ్చింది. ప్రపంచ ఆరోగ్య సంస్థ ప్రకారం భారతదేశం లో బయటపడ్డ రెండు ప్రమాదకరమైన వేరియంట్లలో డెల్టా తో పాటు ‘కప్పా వేరియంట్’ కూడా అందరినీ భయపెడుతోంది.
ఉత్తరప్రదేశ్ రాష్ట్రంలో రెండు కొత్త కేసులు బయటపడ్డాయి. మొత్తం 109 శాంపిల్స్ తీసుకుంటే… వాటిలో 107 డెల్టా కు సంబంధించినవి కాగా మిగిలిన రెండు కప్పా కు చెందినవి. ఇక దీనిని ప్రపంచ ఆరోగ్య సంస్థ గుర్తించి ప్రజలను అప్రమత్తం చేసింది. అయితే ఈ కప్పా వేరియంట్ వెలుగులోకి రావడం ఇదే మొదటిసారి కాదు.
2020 అక్టోబర్ నెలలో కూడా భారతదేశంలో మొట్టమొదటిసారిగా ఈ వైరస్ కనిపించింది. ఇది కూడా బాగా ప్రమాదకరమైనది అని శాస్త్రవేత్తలు చెబుతున్నారు. ప్రపంచ ఆరోగ్య సంస్థ కూడా మొదట్లో దీన్ని డేంజర్ గా పరిగణించలేదు. ఇక ప్రజల్లో వేగంగా వ్యాప్తి చెందడం… అలాగే వారి ఆరోగ్యానికి రిస్కు ఉండేలా దీని ప్రభావం శరీరంపై పడుతుందని అంచనా వేస్తున్నారు.
కానీ ప్రస్తుతం అందుబాటులో ఉన్న వ్యాక్సిన్లు దీని పై బాగ పనిచేస్తాయని వ్యాక్సిన్ తయారీదారులు చెప్పడం గమనార్హం. 21బి నెక్స్ట్ స్ట్రైన్ లో కలిగి ఉన్న ఈ వేరియంట్ కు ఈ సంవత్సరం ఏప్రిల్ 4వ తేదీ న యుఎన్ఓ పేరు పెట్టింది.