Bangarraaju : టాలీవుడ్ మన్మధుడు కింగ్ నాగార్జున కెరీర్ లో బిగ్గెస్ట్ హిట్ గా నిలిచిన ఫ్యామిలీ ఎంటర్టైనర్ ‘సోగ్గాడే చిన్నినాయనా’. ఈ సినిమా బాక్సాఫీస్ వద్ద ఎంతటి ఘన విజయాన్ని సాధించిందో ప్రత్యేకంగా చెప్పక్కర్లేదు. నాగార్జున డ్యూయల్ రోల్ లో నటించిన దీనిలో లావణ్య త్రిపాఠి, రమ్యకృష్ణ హీరోయిన్స్ గా నటించారు. ఈ సినిమా అందుకున్న భారీ సక్సెస్ తో ప్రీక్వెల్ సినిమాగా ‘బంగార్రాజు’ టైటిల్ తో తెరకెక్కాలనుకున్నారు. ‘సోగ్గాడే చిన్నినాయనా’ కి దర్శకత్వం వహించిన కల్యాణ్ కృష్ణ కురసాల ‘బంగార్రాజు’ను తెరకెక్కించనున్నాడు.
నాగార్జున నిర్మాణ సంస్థ అన్నపూర్ణ స్టూడియోస్ బ్యానర్ పై ‘బంగార్రాజు’ సినిమా తెరకెక్కబోతోంది. అయితే గత రెండేళ్లుగా సినిమాకి స్క్రిప్ట్ వర్క్ అలాగే పోస్ట్ ప్రొడక్షన్ వర్క్ జరుపుకుంటున్న సంగతి తెలిసిందే. కాగా ఈ సినిమాను సెట్స్ మీదకి తీసుకు వచ్చేందుకు సిద్దమయింది చిత్ర బృందం. ‘బంగార్రాజు’ మూవీ కోసం హైదరాబాద్ లోనే ఓ ప్రత్యేకమైన సెట్ నిర్మాణం కూడా పూర్తి చేశారు. ఇక ఆగస్టు 20న ‘బంగార్రాజు’ సెట్స్ మీదకు వస్తోందట. ‘బంగార్రాజు’ సినిమాలో నాగార్జున తో పాటుగా ఆయన తనయుడు నాగచైతన్య కూడా నటించనున్నారు.
Bangarraaju : నాగార్జునకి జంటగా రమ్యకృష్ణ, చైతూ సరసన కృతి శెట్టి..?
అంతేకాదు నాగార్జునకి జంటగా రమ్యకృష్ణ, చైతూ సరసన కృతి శెట్టి నటించనున్నట్లు సమాచారం. ఈనెల 20 నుంచి మొదలయ్యే ఫస్ట్ షెడ్యూల్ లో నాగార్జున – రమ్యకృష్ణలపై కొన్ని కీలకమైన సన్నివేశాలను తెరకెక్కిస్తున్నారట. ఇక విశ్వసనీయ వర్గాల ద్వారా అందుతున్న సమాచారం ప్రకారం ‘బంగార్రాజు’ సినిమాను 2022 సంక్రాంతి సీజన్ ను టార్గెట్ చేసుకొని షెడ్యూల్స్ ప్లాన్ చేశారట. అందుకే చిత్రీకరణ మొదలైనప్పటి నుంచి నాన్ స్టాప్ గా షూటింగ్ జరిపి జనవరి 15న ఎట్టి పరిస్థితుల్లోనూ బరిలో దింపనున్నారట. చూడాలి మరి ఈసారి 2022 సక్రాంతికి పెద్ద వార్ ఉండబోతోంది.