జెరూసలెం: ఇజ్రాయెల్ ప్రధాని బెంజమిన్ నెతన్యాహు రికార్డు సృష్టించారు. తీవ్రమైన పోటీ ఎదురైనా కూడా రికార్డు స్థాయిలో ఐదోసారి ఆయన అధికారం చేపట్టారు. ప్రతిపక్ష నాయకుడు బెన్నీ గాంట్జ్ నుంచి గట్టి పోటీ ఉన్నా ఆయన ఎన్నికలలో విజయం సాధించారు. కడపటి వార్తలు అందేసరికి 97 శాతం ఓట్లు లెక్కించినా, అధికారం చేపట్టేందుకు కావల్సిన మెజారిటీ ఇద్దరిలో ఎవరికీ రాలేదు. కానీ ఇప్పటికే నెతన్యాహుకు కొన్ని పార్టీల మద్దతు ఉండటంతో వాటి సాయంతో సంకీర్ణ ప్రభుత్వాన్ని ఆయన ఏర్పాటుచేసే అవకాశం స్పష్టంగా ఉంది.
నెతన్యాహుపై ఇటీవల అవినీతి ఆరోపణలు రావడంతో, ఈ ఎన్నికలను రిఫరెండంగా అందరూ భావించారు. ఆయనపై మూడు కేసులు పెండింగులో ఉన్నాయి. కానీ, తాను ఎలాంటి తప్పు చేయలేదని నెతన్యాహు ఖండిస్తూ వచ్చారు. ఆయనకు చెందిన లికుడ్ పార్టీ, గాంట్జ్ ప్రాతినిధ్యం వహించే బ్లూ అండ్ వైట్ పార్టీ రెండింటికీ తలో 35 స్థానాలు వచ్చాయి. లికుడ్ పార్టీకి మరో ఐదు స్థానాలు లభించినట్లయింది.
ఇది బ్రహ్మాండమైన విజయమని తన మద్దతుదారులతో లికుడ్ పార్టీ ప్రధాన కార్యాలయం వద్ద అర్ధరాత్రి సంబరాలలో నెతన్యాహు (69) అన్నారు. అయితే అధికారిక ప్రకటన వచ్చేవరకు సంయమనం పాటించాలని కోరారు. ఫలితాలు సానుకూలంగా రావడంతో ఆయన భార్య సారా నెతన్యాహుకు ముద్దివ్వగా వెనక టపాసులు పేల్చారు. ఇజ్రాయెల్ తుది ఫలితాలు శుక్రవారం నాటికి వెల్లడయ్యే అవకాశం ఉంది. 71 ఏళ్ల ఇజ్రాయెల్ చరిత్రలో సుదీర్ఘకాలం పాలించిన ప్రధాని ఆయనే అవుతారు. 2009 నుంచి వరుసగా ఆయనే అధికారంలో ఉన్నారు. అయితే, ఈ ఎన్నికల్లో తాము గెలిచామని ప్రతిపక్ష నేత రివల్ గంట్జ్ అంటున్నారు. ఇన్నాళ్లూ జాతికి సేవ చేసినందుకు నెతన్యాహుకు ధన్యవాదాలు తెలిపారు.