చిత్తూరు: రాష్ట్రంలో ఇసుక మాదిరే ఉల్లి గడ్డల కోసం ప్రజలు ఇబ్బంది పడుతున్నారని జనసేన అధినేత పవన్ కళ్యాణ్ అన్నారు. మంగళవారం తిరుపతిలోని ఆర్‌సి రోడ్డు వద్ద ఉన్న రైతుబజారును పార్టీ నేతలతో కలిసి సందర్శించారు. రైతుబజారులో ఉల్లిపాయల కోసం బారులు తీరి ఉన్న వినియోగదారులతో మాట్లాడి వారి సమస్యలను అడిగి తెలుసుకున్నారు.
ఉల్లి కోసం ప్రజలు పడుతున్న కష్టాలు ప్రభుత్వ వైఫల్యమేనని పవన్ విమర్శించారు. ప్రతి విషయంలోనూ గత ప్రభుత్వాలదే తప్పు అంటూ తప్పించుకోవడం సమస్యకు పరిష్కారం కాదని అన్నారు. ప్రణాళికలు రచించడంలో ప్రభుత్వం విఫలమవుతోందని పవన్ వ్యాఖ్యానించారు. ప్రభుత్వానికి పరిపాలనా సమర్థత లేకపోతే తప్పుకొని మళ్లీ ఎన్నికలకు వెళ్లాలని పవన్ డిమాండ్ చేశారు.
