జగన్న్ దే రైట్… అవినీతిని సహించకూడదు, విచారణలు జరగాల్సిందే అని జనసేన అంటే… అవినీతి విషయంలో అరెస్టులు చేయడం, విచారణలు చేయడం మంచి నిర్ణయమని బీజేపీ స్పందిస్తుంది. జగన్ అధికారంలోకి వచ్చి ఇన్ని రోజులైనా గత ప్రభుత్వ హయాంలో జరిగిన అవినీతిని వెలికితీయలేకపోయాడు.. ఒక అసమర్ధ ముఖ్యమంత్రి అని రెచ్చగొట్టినట్లు మాట్లాడిన కన్నా లక్ష్మీ నారాయణ.. అచ్చెన్నాయుడు వ్యవహారంలో స్పందించారు. ప్రభుత్వం మంచి నిర్ణయం తీసుకుందని.. అవినీతికి పాల్పడే వారు ఎవరైనా అరెస్ట్ చేయాల్సిందేనని స్పష్టంం చేస్తున్నారు.
ఇదే విషయంపై స్పందించిన సోము వీర్రాజు… టీడీపీ నేత, మాజీ మంత్రి అచ్చెన్నాయుడు అరెస్ట్ సబబేనని అన్నారు. ప్రతి పక్షనేత చంద్రబాబు చేసిన వ్యాఖ్యలను తప్పుబట్టిన ఆయన… బీసీలందరూ బయటకు వచ్చి నిరసన తెలపాలని మాట్లాడటం దారుణమని సోము వీర్రాజు పేర్కొన్నారు. ఇదే క్రమంలో… ఈఎస్ఐ కుంభకోణంలో అచ్చెన్నాయుడు పాత్ర రుజువైందని అభిప్రాయపడిన బీజేపీ అధికార ప్రతినిధి లక్ష్మీపతి రాజా… తప్పు చేసిన వాళ్లు శిక్ష అనుభవించాల్సిందేనని స్పష్టం చేశారు. అవినీతికి పాల్పడిన సొమ్మును అచ్చెన్నాయుడు నుంచి రికవరీ చేయాలని ఆయన డిమాండ్‌ చేశారు.
ఇక ఇదే విషయంలో బీజేపీ కేంద్రమాజీ మంత్రి సీనియర్ నాయకురాలు పురంధేశ్వరి కూడా స్పందించారు. ఈ కుంభకోణం కోట్ల రూపాయలదని.. అచ్చెన్నాయుడి పాత్ర ఉన్నట్లు తనకు తెలియదని తెలిపింది. అవినీతి చేస్తే అరెస్ట్ చేయడం కరెక్టేనని.. అవినీతికి పాల్పడిన వారిని బీజేపీ క్షమించే ప్రసక్తే లేదని పురంధేశ్వరి తెలిపింది. ఇక ఈఎస్ఐ కుంభకోణంలో అచ్చెన్నాయుడి పాత్ర ఒక్కడిదే ఉంటుందని తాను అనుకోవడం లేదని.. చంద్రబాబు ప్రభుత్వంలోని మరికొందరు పెద్ద తలకాయల పాత్ర ఉండే అవకాశాలు కొట్టిపారేయలేమని జీవీఎల్ అనుమానం వ్యక్తం చేశారు. చంద్రబాబుకు లోకేష్ కు తెలియకుండా ఈ కుంభకోణం జరిగి ఉంటుందని తాను అనుకోవట్లేదన్న ఆయన… సమగ్ర దర్యాప్తు జరిపి నిజాలను జగన్ ప్రభుత్వం వెలికితీయాలని కోరారు.
