ఈ-సిగరెట్లు వాడుతూ అవి ఆరోగ్యానికి ఎలాంటి హాని కలిగించదు అని మీరు అనుకుంటూ ఉంటే…ఈ సమాచారం మీకోసమే. వేపర్స్గాపిలవబడే ఈ-సిగరెట్ల వల్ల గుండె, గుండెజబ్బులు,గుండె నాళాలకు సంబంధించిన రోగాలు ఏర్పడుతున్నాయి.వేపర్స్ పీల్చేవారిలో 60 శాతం మందికి హార్ట్ ఎటాక్ వస్తున్నట్లు అమెరికా హార్ట్ అసోసియేషన్ జరిపిన పరిశోధనలో తేలింది.
ఈ-సిగరెట్ల స్మోకింగ్… ఒక సాధారణ సిగరెట్ స్మోకింగ్కి సమానమైన నష్టాలు తెస్తోందని తెలిసింది.యువత ఎక్కువగా… ఈ-సిగరెట్లు వాడుతూ… గుప్పుగుప్పున పొగ వదులుతూ… అదో ఫ్యాషన్లా సంబర పడిపోతున్నారు. ఈ- స్మోకింగ్ వల్ల కార్డియో వస్క్యురర్ జబ్బు వస్తోందని కెంటకీ న్యూరోసైన్స్ ఇన్స్టిట్యూట్ ఛైర్మన్ ల్యారీ గోల్డ్ స్టెయిన్ తెలియచేసారు.
స్మోకింగ్ ఎలా వదిలించుకోవాలో తెలియట్లేదా… ఐతే… వేపర్స్ వాడిచూడండి. ఇవి పొగతాగే అలవాటును దూరం చేస్తాయి అని వేపర్స్ తయారీదార్లు చెప్పుకొస్తున్న, వాస్తవంలో అది జరగట్లేదనీ, పొగతాగే అలవాటు మానుకో లేకపోతున్నారని పరిశోధనలో తేలింది. మొత్తం 4,00,000 మందిని పరిశోధించగా… వారిలో 66,795 మంది వేపర్స్ వాడుతున్నారు. వారిలో 71 శాతం మందికి గుండె జబ్బులు వచ్చే అవకాశాలు ఉన్నట్లు తేలింది. గుండె నొప్పి లేదా యాంజినా 59 శాతం మందికి వచ్చే ప్రమాదం ఉందని తేలింది. యాంజినా అనేది రొమ్ముపై వచ్చే ఒక రకమైన నొప్పి.
గుండెకు రక్త సరఫరా సరిగా లేనప్పుడు ఈ నొప్పి వస్తుంది. పరిశోధనలో మరో విషయం కూడా బయట పడింది . వేపర్స్ పీల్చే 40 శాతం మందికి గుండెకు సంబంధించిన జబ్బులు వచ్చే ప్రమాదం ఉందని తేలింది . ఐతే మరణం సంభవిస్తుందా లేదా అన్నది మాత్రం పరిశోధించలేదు. పొగతాగే వాళ్లలో 4.2 శాతం మంది పెద్దవాళ్ళు ఈ-సిగరెట్లు వాడుతుండగా,11.3 శాతం హైస్కూల్ విద్యార్థులు ఉన్నారని తేలింది. ఇలాంటి వాటికి యువత ఆకర్షితులు కాకుండా ప్రభుత్వాలే చర్యలు తీసుకోవాలి. స్వీట్ ఫ్లేవర్లతో వచ్చే ఈ-లిక్విడ్స్ను నిషేధించాలి. ఈ సిగరెట్ల వల్ల లాభం సంగతేమోగానీ… అవి సేఫ్ కాదన్నది మాత్రం నిజమని పరిశోధనలు తేల్చాయి .