లక్ష్మీ నారాయణ విశాఖ మేనిఫెస్టో

విశాఖ: జనసేన పార్టీ లోక్ సభ స్థానం నుంచి ఎన్నికల బరిలో నిలిచిన వివి లక్ష్మీ నారాయణ ఉగాది రోజున నూతన ఒరవడికి శ్రీకారం చుట్టారు.  ఆయన తన సొంత మేనిఫెస్టోను బాండ్ పేపర్‌పై రాసి మీడియాకు విడుదల చేశారు.

ముందుగా చెప్పిన విధంగా విశాఖ మేనిఫెస్టోను విడుదల చేస్తున్నానని, ఇందులోని అన్ని అంశాలనూ తాను చేసి చూపిస్తానని లక్ష్మీ నారాయణ అన్నారు. విశాఖ ప్రజల అవసరాలను తీర్చేందుకు కృషి చేస్తానని లక్ష్మీ నారాయణ పేర్కొన్నారు.

వంద రూపాయల బాండ్ పేపర్‌పై లక్ష్మీ నారాయణ ఎన్నికల వాగ్దానాలను పొందు పరిచారు. విశాఖను సేఫ్, క్లీన్, హ్యాపీ సిటీగా తీర్చిదిద్దుతామని పేర్కొన్నారు.

విద్య, ఉపాధి, శాంతిభద్రతల పరిరక్షణకు ప్రత్యేక చర్యలు తీసుకుంటామని లక్ష్మీ నారాయణ హామీ ఇచ్చారు. ప్రజలకు సురక్షిత తాగునీటి సరఫరా కోసం ఇంటిగ్రేటెడ్ వాటర్ పంపిణీ వ్యవస్థ ఏర్పాటు చేస్తామన్నారు. కాలుష్య నియంత్రణకు ఐదేళ్ళలో విద్యార్ధుల భాగస్వామ్యంతో రెండు కోట్ల మొక్కలు నాటడం లక్ష్యంగా పెట్టుకున్నామని లక్ష్మీ నారాయణ వెల్లడించారు.

‘బాండ్ పేపర్ మీద మేనిఫెస్టో ఇవ్వబోతున్నాను. ఆ దమ్ము మాకు ఉంది. ఒకవేళ మేనిఫెస్టోలోనివి నేను చేయకపోతే రేపు నన్ను కోర్టుకు లాగొచ్చు’ అని గతంలో లక్ష్మీ నారాయణ ప్రకటించారు.

హామీలను బాండ్ పేపర్ పైన ఇచ్చిన జనసేన విశాఖపట్నం పార్లమెంట్ అభ్యర్థి @VVL_Official (2) pic.twitter.com/GDEm38FZgM

— JanaSena Party (@JanaSenaParty) April 6, 2019

sarath

See Full Bio