Lifetime lessons: మనుషులుగా పుట్టిన మనందరికీ కొన్ని ధర్మాలు ఉన్నాయి వాటిగురించి తెలుసుకుందాం .. తల్లిదండ్రులను పూజించాలి గౌరవించాలి కానీ ఏ స్థితిలోనూ వారిని తిట్టకూడదు. నడుస్తూ కాని, నిలబడి కాని మలమూత్రాదులువిడవడం వంటి పనులు చేయకూడదు. దేవాలయాల్లోనూ, గోశాలలోను మలమూత్రాదులు విడువకూడదు . ఉత్తర, దక్షిణ దిశలుగా మాత్రమేమలమూత్ర విసర్జన చేయాలి.
తూర్పు, దక్షిణ దిక్కుల కు తల పెట్టి నిద్రపోవాలి, ఉత్తర, పశ్చిమాల వైపు తల పెట్టి నిద్రిస్తే వారు ప్రమాదాల పాలౌతారని మార్కండేయ పురాణం తెలియచేస్తుంది . ఎప్పుడూ రెండు చేతులతో తల గోక్కోరాదు. ఇతరులు వాడిన చెప్పులు, వస్త్రాలు ధరించకూడదు. చతుర్దశి, అష్టమి రోజులలో తలంటు స్నానం, స్త్రీ సంగమం చేయకూడదు.
భోజనం అయిన తర్వాత కంచం లోనే చేయి కడుక్కోకూడదు. చేయి కడిగిన తరువాత ఆ తడి చేతిని విదల్చడం వంటివి చేయకూడదు.పిసినిగొట్టుతో, శత్రువుతో, అసత్యం పలికే వాడితో భర్తను తిట్టే స్త్రీ తో కలిసి భోజనం చేయటం మహాపాపం. నోటితో ఊది అగ్నిని ఆర్పరాదు. ప్రయాణం మధ్య లో ఉన్నప్పుడు భోజనాదులకు నియమం పాటించవలిసిన పని లేదు. తడిసిన బట్టల నీళ్ళు ఇతరులపై పడేట్లు వదిలించకూడదు. ఎట్టి పరిస్థితులలోను ఆత్మహత్య చేసుకోకూడదు. ఒకవేళ అలా చేసుకున్నవారు కొన్ని వేల జన్మలు పిశాచ జన్మలెత్తి వికలాంగులై ఇప్పుడు ఉన్న జన్మ కన్నా 1000 రేట్లు కష్టాలు అనుభవించాలిసి వస్తుంది.. పుష్కర స్నానాదులలో చొక్కా ఉంచుకుని స్నానం చేయరాదు. కండువా మాత్రమే వేసుకుని స్నానం చేయాలి .
కూర్చొని తొడలు, కాళ్ళు ఊపినవాడు వచ్చే జన్మ లో కుంటివాడై పుడతాడు. తూర్పు, ఉత్తరముఖంగా ఉండి మాత్రమే పళ్ళు తోముకోవాలి.ఒకేసారి నీరు, నిప్పు రెండు చేతులతో గాని, ఒకే చేత్తోగాని తీసుకువెళ్లరాదు .నిద్రపోతున్న వారిని అనవసరంగా లేపటం , పురాణ కథలు జరుగుతున్నపుడు విఘ్నం కలుగచేయడం , భార్యాభర్తలను విడదీయడం, తల్లిని బిడ్డను విడదీయడం వంటివి బ్రహ్మహత్యాపాతకాలతో సమానం. (సమయం ,సందర్భం లేకుండా నిద్రించేవారి విషయం లో ఇది వర్తించదు. చిన్న పిల్లల్ని, అనారోగ్యవంతుల దగ్గరికి వెళ్ళేటప్పుడు, గుడికి, గురుదర్శనానికి ,పురాణం వినటానికి వెళ్ళేటప్పుడు ఒట్టి చేతులతో వెళ్ళకూడదు . ఏదో ఒకటి వారికీ ఇవ్వాలి .
