Liz Truss: బ్రిటన్ ప్రధాని లిజ్ ట్రస్ తన పదవికి రాజీనామా చేశారు. ప్రధాని పదవి చేపట్టిన 45 రోజుల్లోనే ఆమె ఆ పదవి నుండి తప్పుకోవడం గమనార్హం. ప్రధాని రాజీనామాతో బ్రిటన్ లో మరో మారు రాజకీయ సంక్షోభం నెలకొంది. లిజ్ ట్రస్ ఇటీవల ప్రవేశపెట్టిన మినీ బడ్జెట్ పై తీవ్ర విమర్శలు వచ్చాయి. దేశంలో అంతకంతకూ పెరుగుతున్న ఆర్ధిక సంక్షోభాన్ని అదుపు చేయలేక ప్రధాని బోరిస్ జాన్సన్ తన పదవికి రాజీనామా చేసిన తర్వాత 45 రోజుల క్రితం లిజ్ ట్రస్ ప్రధానిగా ఎన్నికైన సంగతి తెలిసిందే. భారత సంతతికి చెందిన రుషి సునక్ తో పోటీ పడి ఆమె విజయం సాధించారు.
మినీ బడ్జెట్ పై విమర్శలు రావడంతో అందుకు దేశ ప్రజలకు లిజ్ ట్రస్ క్షమాపణలు తెలియజేస్తూ ప్రకటన విడుదల చేశారు. దేశంలో ఆర్ధిక సంక్షోభం తీవ్రతరం కావడంతో ట్రస్ కేబినెట్ లోని పలువురు మంత్రులు తమ పదవులకు రాజీనామా చేశారు. దీంతో విధిలేని పరిస్థితిలో లిజ్ ట్రస్ తన పదవికి రాజీనామా చేశారు. ఆమె కేవలం 44 రోజులే ప్రధాని పదవిలో కొనసాగారు. సెప్టెంబర్ 6న ప్రధానిగా బాధ్యతలు చేపట్టారు లిజ్ ట్రస్. తన రాజీనామా విషయాన్ని బ్రిటన్ రాజుకు తెలియపర్చాననీ, తదుపరి ప్రధానిని ఎన్నుకునే వరకు పదవిలో కొనసాగనున్నట్లు మీడియాకు తెలిపారు లిజ్ ట్రస్.
తీవ్ర ఆర్ధిక, అంతర్జాతీయ అస్తిరత కొనసాగుతున్న తరుణంలో తాను ప్రధాని పదవి చేపట్టానని పేర్కొన్న లిజ్ ట్రస్.. ఉక్రెయిన్ పై రష్యా యుద్దం కొనసాగిస్తుండటం యూరప్ తో పాటు బ్రిటన్ కు ముప్పుగా పరిణమించిందని, ఈ పరిస్థితి దేశ ఆర్ధిక పరిస్థితిని మరింత క్షీణింపజేసిందని తెలిపారు.
