కాంగ్రెస్ పార్టీ నూతన అధ్యక్షుడుగా ఆ పార్టీ సీనియర్ నేత మల్లికార్జున్ ఖర్గే ప్రమాణ స్వీకారం చేశారు. ఇటీవల జరిగిన కాంగ్రెస్ పార్టీ అధ్యక్ష ఎన్నికల్లో ఆ పార్టీ సీనియర్ నేత, ఎంపీ శశిథరూర్ పై మల్లికార్జున్ ఖర్గే ఘన విజయం సాధించిన సంగతి తెలిసిందే. ఈ రోజు ఢిల్లీలోని ఏఐఐసీ కార్యాలయంలో మల్లికార్జున్ ఖర్గే ప్రమాణ స్వీకారం కార్యక్రమం జరిగింది. ఈ కార్యక్రమానికి సోనియా గాంధీ, రాహుల్ గాంధీ, ప్రియాంక గాంధీ వద్రా, కేసి వేణుగోపాల్ సహా ఇతర ముఖ్య నేతలు హజరైయ్యారు.
కొత్తగా బాధ్యతలు చేపట్టిన ఖర్గేకు సోనియా, రాహుల్ గాంధీలు పుష్పగుచ్చం అందజేసి శుభాకాంక్షలు తెలిపారు. అనంతరం కాంగ్రెస్ సారధ్య బాధ్యతలను ఖర్గేకు సోనియా అప్పగించారు. కొత్త నాయకత్వంలో పార్టీ ముందుకు వెళ్తుందని ఆశిస్తున్నానని సోనియా గాంధీ పేర్కొన్నారు. సీనియర్ నాయకుడైన ఖర్గే నాయకత్వంలో ముందుకు వెళ్తామని చెప్పారు. ఖర్గేకు పూర్తి సహాయ సహకారాలు ఉంటాయని తెలిపారు. ఖర్గే ఎంతో అనుభవం ఉన్న నాయకుడు అని పేర్కొన్నారు. కాంగ్రెస్ పార్టీ ముందు చాలా సవాళ్ల ఉన్నాయని, సవాళ్లను ఎదుర్కొని ముందుకు నడిపించే సమర్ధత ఉందని నమ్ముతున్నానని అన్నారు సోనియా గాంధీ.
నూతన అధ్యక్షుడు మల్లికార్జున్ ఖర్గే మాట్లాడుతూ.. తనపై నమ్మకం ఉంచిన ప్రతి ఒక్కరికీ ధన్యవాదాలు తెలుపుతున్నానన్నారు. కాంగ్రెస్ పార్టీని ముందుకు నడిపించేందుకు శాయశక్తులా కృషి చేస్తానని పేర్కొన్నారు. బాధ్యతల నిర్వహణలో అందరి సహకారం తీసుకుంటానని చెప్పారు. కాంగ్రెస్ పార్టీ సిద్ధాంతాలను ముందుకు తీసుకువెళ్లడమే లక్ష్యంగా పేర్కొన్నారు. అధికార రాజకీయాల యుగంలో సోనియా గాంధీ నిశ్వార్ధ త్యాగం అసమానమైనదని కొనియాడారు ఖర్గే.
దాదాపు 24 సంవత్సరాల తర్వాత కాంగ్రెస్ పార్టీ పగ్గాలు చేపట్టిన గాంధీ కుటుంబేతర నేతగా ఖర్గే అరుదైన ఘనత సాధించారు. జగజ్జీవన్ రామ్ తద్వార ఆ పదవి చేపట్టిన రెండో దళిత నేతగానూ ఖర్గే నిలిచారు.
