మాస్ మహారాజా రవితేజ ప్రస్తుతం వరస ప్లాపులతో సతమతమవుతున్న విషయం తెల్సిందే. రాజా ది గ్రేట్ తర్వాత రవితేజ నుండి సరైన సక్సెస్ అందలేదు. రీసెంట్ గా వచ్చిన మూడు సినిమాలు టచ్ చేసి చూడు, అమర్ అక్బర్ ఆంథోనీ, డిస్కో రాజా దారుణమైన ఫలితాలను అందుకున్నాయి. డిస్కో రాజా అయితే సింగిల్ డిజిట్ షేర్ కే అంకితమైపోయింది.
ఈ నేపథ్యంలో రవితేజ చేస్తున్న చిత్రం క్రాక్. గోపీచంద్ మలినేని దర్శకత్వంలో యాక్షన్ కామెడీ ఎంటర్టైనర్ ను చేస్తున్నాడు రవితేజ. శృతి హాసన్ కథానాయిక. ఈ సినిమా షూటింగ్ దాదాపు పూర్తయింది. కరోనా రాకపోయి ఉండుంటే సమ్మర్ లోనే క్రాక్ విడుదలైపోయేది. అయితే దసరా తర్వాత ఈ చిత్ర బ్యాలెన్స్ షూట్ ను మొదలుపెట్టి నవంబర్ కల్లా షూటింగ్ ను పూర్తి చేయాలన్నది ప్లాన్. దీని తర్వాత రవితేజ రమేష్ వర్మ దర్శకత్వంలో ఖిలాడీ చిత్రాన్ని చేయాల్సి ఉంది. పూర్తి స్థాయి యాక్షన్ ఎంటర్టైనర్ గా ఈ సినిమా తెరకెక్కుతుంది.
ఇక తాజా సమాచారం ప్రకారం రవితేజకు మారుతి కథను వినిపించాడట. మారుతి చెప్పిన స్క్రిప్ట్ రవితేజకు తెగ నచ్చేసిందని టాక్. పూర్తి స్థాయి కామెడీ చిత్రంగా మారుతి – రవితేజ సినిమా ఉండనుంది. రమేష్ వర్మ సినిమా కంటే ముందే మారుతీ చిత్రం చేసే అవకాశాలు కూడా ఉన్నాయి. ఈ నేపథ్యంలో ఈ ప్రాజెక్టుకు సంబంధించి తాజా సమాచారం అందరిలో ఆసక్తి రేకెత్తిస్తోంది. మారుతి స్క్రిప్ట్ లో రవితేజది లాయర్ పాత్ర అంటున్నారు. రవితేజకు నిజంగా లాయర్ పాత్ర అంటే చాలా కొత్తగా ఉంటుంది. మరి అటువంటి పాత్రలో రవితేజ ఎలాంటి పెరఫార్మన్స్ తో ఆకట్టుకుంటాడన్నది ఆసక్తికరంగా మారింది. ఈ ప్రాజెక్టుకు సంబంధించిన మరిన్ని వివరాలు త్వరలోనే బయటకు రానున్నాయి.