Sidiri Appalaraju : శ్రీకాకుళం జిల్లా పలాస మున్సిపల్ ఎన్నికల్లో వైసీపీ ఆపరేషన్ ఆకర్ష్ కొనసాగుతోంది. అయితే ఈసారి టీడీపీకి కాకుండా బీజేపీకి షాక్ ఇచ్చింది వైసీపీ. బీజేపీ తరుఫున నామినేషన్ వేసిన ఇద్దరు అభ్యర్థులు వైసీపీ గూటికి చేరారు. మంత్రి సీదిరి అప్పల్రాజు సమక్షంలో ఆ ఇద్దరు వైసీపీ కండువా కప్పుకున్నారు. 21వ వార్డు అభ్యర్థి దేవరశెట్టి బాలాజీ గుప్తా వైసీపీలో చేరిపోయారు. అలాగే 26 వార్డు బీజేపీ అభ్యర్థి మళ్లా రమ్య ఫ్యాన్ గూటికి చేరారు. రెండు రోజుల క్రితం టీడీపీ తరుఫున నామినేషన్లు వేసిన నలుగురు అభ్యర్థులు వైసీపీలో చేరారు.
Sidiri Appalaraju : మంత్రి గారా ?మజాకా?
ఏపీలో మున్సిపల్ ఎన్నికల వేళ జోరుగా ఆపరేషన్ ఆకర్ష్ కొనసాగిస్తున్నారు అధికార పార్టీ నేతలు. శ్రీకాకుళం జిల్లా పలాస-కాశీబుగ్గ మున్సిపాలిటీలో అత్యధిక వార్డులను గెలిచి మున్సిపల్ ఛైర్మన్ కుర్చీని కైవసం చేసుకునేందుకు మంత్రి సీదిరి అప్పలరాజు వేగంగా పావులు కదుపుతున్నారు. మొన్న టీడీపీ నుంచి నలుగురు కౌన్సిలర్ అభ్యర్ధులను వైసీపీలో చేర్చుకుని టీడీపీకి షాక్ ఇచ్చిన మంత్రి.. తాజాగా బీజేపీ తరఫున నామినేషన్ వేసిన ఇద్దరు అభ్యర్థులను వైసీపీలో జాయిన్ చేసేసుకుని కమలం పార్టీ నేతలకు ఝలక్ ఇచ్చారు.పలాస-కాశీబుగ్గ మున్సిపాలిటీలో మొత్తం 31 వార్డులకు గాను 135 నామినేషన్లు దాఖలయ్యాయి. ఈ మున్సిపాలిటీలో మొత్తం 9 వార్డులకు బీజేపీ నామినేషన్లు దాఖలు చేయగా అందులో ఇద్దరిని వైసీపీ ఆపరేషన్ ఆకర్ష్ లో లాగేయడంతో ఇప్పుడు మిగతా అభ్యర్ధులు ఉంటారా లేక వారూ జెండా పీకేస్తారా అనే చర్చ జరుగుతోంది.
ఇంత దిక్కుమాలినతనమా:లోకేశ్!
వైసీపీ తరుపున మున్సిపల్ ఎన్నికల్లో పోటీ చేసేందుకు అభ్యర్థులు లేక.. టీడీపీ అభ్యర్థులను బెదిరించి, ప్రలోభాలకు గురిచేసి బులుగు కండువాలు కప్పారని టీడీపీ జాతీయ ప్రధాన కార్యదర్శి నారా లోకేష్ మండిపడ్డారు. పలాస, రాయదుర్గంతోపాటు రాష్ట్రమంతా పోటీకి అభ్యర్థులు లేని దిక్కుమాలిన పార్టీ అధినేత జగన్ అని ఆరోపించారు. తాడేపల్లి కొంప గేటు దాటి వస్తే జనం తంతారని భయమని ఎద్దేవా చేశారు. వైసీపీ అభ్యర్ధులకు జనంలోకి వెళ్లి ఓటు అడగాలంటే భయమని.. అందుకే పంచాయతీ ఎన్నికలు పీకమీద కత్తి పెట్టి ఏకగ్రీవాలు చేసుకున్నారని ఆరోపించారు. పురపాలక ఎన్నికల్లో గెలిచే టీడీపీ అభ్యర్థుల్ని ముందుగానే పార్టీలో చేర్చుకుంటున్నారని.. నువ్వొక నాయకుడివి.. నీదొక పార్టీ.. అందుకే నిన్ను పిరికివాడు అనేది జగన్ రెడ్డి అంటూ ఫైర్ అయ్యారు నారా లోకేష్.
