వారసత్వ రాజకీయాలపై ప్రధాని నరేంద్ర మోడీ మరోసారి ఆగ్రహం వ్యక్తం చేశారు. 12వ తారీకు స్వామి వివేకానంద జన్మదినోత్సవం సందర్భంగా జాతీయ యువ పార్లమెంటును ఉద్దేశించి ప్రధాని మోడీ సంచలన వ్యాఖ్యలు చేశారు. దేశానికి అతిపెద్ద శత్రువు వారసత్వ రాజకీయాలు అని స్పష్టం చేశారు. ఇలాంటి రాజకీయాల వల్ల ప్రజాస్వామ్యం ప్రమాదంలో పడుతుందని పేర్కొన్నారు.
అంత మాత్రమే కాక దేశవ్యాప్తంగా ఉన్న యువత మేల్కోవాలి అని, రాజకీయాల్లోకి రావాలని పిలుపునిచ్చారు. యువత రాకపోతే కుటుంబాలు ప్రభుత్వ వ్యవస్థలను ఏలుబడి చేస్తాయని..వారసత్వ రాజకీయాలు కొనసాగుతాయని పేర్కొన్నారు. దేశంలో వారసత్వ రాజకీయాలను ఎంతైనా పెక్కిలించాల్సిన అవసరం ఉందని మోడీ సీరియస్ వ్యాఖ్యలు చేశారు.
ఇదిలావుంటే ఇటీవల ప్రజలలో మార్పు వచ్చిందని ఇంటి పేరుతో గెలిచే రాజకీయ నాయకుల సంఖ్య రోజురోజుకీ తగ్గుతుండటం అందుకు నిదర్శనమని పేర్కొన్నారు. కేవలం తమ కుటుంబాలను కాపాడుకోవడం కోసమే వారసత్వ రాజకీయాలు చేస్తున్నారని ఎద్దేవా చేశారు. అంతేకాకుండా దేశం ఎదుర్కొంటున్న అతిపెద్ద ప్రమాదాలలో వారసత్వ రాజకీయం కూడా ఒకటి అని మోడీ స్పష్టం చేశారు. దీంతో గాంధీ కుటుంబాన్ని అదే విధంగా కొన్ని చోట్ల ప్రాంతీయ పార్టీలు వారసత్వ రాజకీయాల తరహాలో పరిస్థితి ఉండటంతో మోడీ వాళ్ళను ఉద్దేశించి ఈ వ్యాఖ్యలు చేసినట్లు విశ్లేషకులు భావిస్తున్నారు. ఏది ఏమైనా స్వామి వివేకానంద జయంతి సందర్భంగా వారసత్వ రాజకీయాలు దేశంలో తగ్గుతున్నట్లు మోడీ పేర్కొనడం, అదే రీతిలో వారసత్వ రాజకీయాలు ఉండేచోట యువత ముందుకు వచ్చి.. పోటీ చేయాలని మోడీ పిలుపునివ్వడం దేశవ్యాప్తంగా ఆయన చేసిన వ్యాఖ్యలు చర్చనీయాంశంగా మారాయి.
