Makeup :కళ్లు ఎంత చిన్నవి అయినా కొంచెం కాటుక తో అలంకరిస్తే పెద్దగా, అందంగా ఆకర్షణీయంగా కనిపిస్తాయి. కాటుక మన కళ్ళ ను దుమ్ము, ధూళి ఎండ, నుంచి కాపాడటమే కాక కళ్లను తాజాగా, మెరిసేలా ఉండేందుకు ఉపయోగపడుతుంది. మంగళ ద్రవ్య మైన కాటుక పెట్టుకోవడం వలన సుమంగళి త్వాన్ని ప్రసాదిస్తుందని పెద్దలు చెప్పిన మాట. కాటుక కంటి కి చలువ చేస్తుందని ఆయుర్వేదం చెబుతోంది. అయితే కాటుక వినియోగం నేడు తగ్గిపోయింది.
చాలామంది కాటుక స్థానంలో ఐ లైనర్, మస్కారాలను ఉపయోగిస్తున్నారు. ఇవి కూడా ముఖానికి అందాన్నిస్తాయి. కానీ ఆరోగ్యానికి మాత్రం కాదు. కాటుక కంటికి అందం తో పాటు ఆరోగ్యాన్ని కూడా ఇస్తుంది. అయితే కాటుక పెట్టుకునేటప్పుడు కొన్ని చిట్కాలు పాటిస్తే కళ్ళు మరింత అందంగా ఆకర్షణీయంగా ఉంటాయి . కాటుక పెట్టుకోవాలనుకున్న పుడు ముందు ముఖాన్ని శుభ్రంగా కడుక్కొని కళ్ల పై తడి లేకుండా చేసుకోవాలి .
కాటుక పెట్టుకునే ముందు కనురెప్పను మెత్తని వస్త్రంతో మృదువుగా తుడుచుకోవాలి. దీనివల్ల కనురెప్పలపై ఉండే జిడ్డు పూర్తిగా పోతుంది. లేదా పౌడర్ కళ్ల చుట్టూ రాస్తే చర్మంపై జిడ్డు పౌడర్ పీల్చుకుని కళ్ళు అందం గా కనిపిస్తాయి. కనురెప్పల అంచుల కింద భాగంలో కాటుక పెట్టుకుంటే చెరిగి మరింత వెడల్పవుతుంది. కనుక కనురెప్పల మధ్య మాత్రమే కాటుక పెట్టుకోవాలి.
కాటుక పెట్టుకునే ముందు లైట్ కలర్ ఐషాడో బేస్గా కళ్లకివేసుకున్నా కాటుక ఎక్కువసేపు చెదిరిపోకుండా ఉంటుంది . కళ్లకి ఎప్పుడూ నాణ్యమైన కాటుక మాత్రమే వాడాలి. సొంతం గా తయారు చేసుకున్న కాటుకకూడా వాడవచ్చు. కాటుక కొన్న తర్వాత వాడినప్పుడు దురద పెట్టడం, కళ్లు మంటపుట్టడం వంటి లక్షణాలు కనిపిస్తే వెంటనే ఆ కాటుక పెట్టుకోవడం ఆపేయాలి.
ఎక్కువగా చెమట పట్టే చర్మం ఉన్నవారు, ఉక్కపోతగా ఉన్నప్పుడు కూడా కాటుక పెట్టుకోవాలనుకున్నప్పుడు ముందు ముఖాన్ని ఐస్ క్యూబ్ తో మసాజ్ చేసుకోవాలి. అలా చేయడం వలన చెమట ఎక్కువ పట్టదు. కాటుక పెట్టుకున్న కూడా చెదరకుండా అందంగా ఉంటుంది. ఇంకా చెప్పాలంటే ఎంత మేకప్ వేసుకున్న కాటుక పెట్టుకోక పోతే అసలు అందం ఉండదు.కాటుక పెట్టుకుని మేకప్ చేసుకోక పోయిన మొహం చాలా అందంగా ఉంటుంది అని గుర్తు పెట్టుకోండి..