కరోనా వల్ల ఈసారి బిగ్ బాస్ తెలుగు సీజన్ 4 నిర్వహిస్తారా? నిర్వహించరా? అన్న డౌట్ల నుంచి బిగ్ బాస్ షో త్వరలోనే ప్రారంభం కాబోతున్నది అనే వరకు బిగ్ బాస్ ఫ్యాన్స్ ఎదురుచూశారు. ఇక.. ఇప్పుడు మాత్రం ఎప్పుడు షో ప్రారంభం అవుతుందా అని కళ్లకు ఒత్తులు వేసుకొని మరీ చూస్తున్నారు. బిగ్ బాస్ షోకు తెలుగు రాష్ట్రాల్లో ఉన్న క్రేజ్ అలాంటిది మరి.
మూడో సీజన్ సూపర్ సక్సెస్ అయ్యాక.. అంతకంటే రెట్టింపు వినోదాన్ని పంచాలన్న ఉద్దేశంతో బిగ్ బాస్ యాజమాన్యం కూడా అన్ని రకాలుగా షోను రూపొందిస్తోందట.
కంటెస్టెంట్లను అన్ని రకాల రంగాల నుంచి ఎంచుకున్నదట. మొత్తానికి 14 మందిని ఫైనల్ కంటెస్టెంట్లుగా సెలక్ట్ చేసినట్టు సమాచారం. ఆ 14 మంది లిస్టు కూడా సోషల్ మీడియాలో వైరల్ అవుతోంది. అయితే వాళ్లలో ఒకరి పేరు మాత్రం బిగ్ బాస్ అభిమానులను ఉర్రూతలూగిస్తోంది. ఆమె మరెవరో కాదు మై విలేజ్ షో గంగవ్వ.
ఈసారి కరోనా ఉండటంతో ఇదివరకు సీజన్లలో ఇచ్చిన టాస్కులు కాకుండా కొత్తగా టాస్కులు ఇవ్వాలని బిగ్ బాస్ యాజమాన్యం ఆలోచిస్తున్నదట. అందుకే ఈసారి సెలెక్ట్ చేసిన వాళ్లలో దాదాపు అందరూ మంచి మాటకారులే ఉన్నారు. మాటలతో మాయ చేసే కంటెస్టెంట్లను సెలెక్ట్ చేసినట్టు తెలుస్తోంది.
అందులో భాగంగానే గంగవ్వను కూడా బిగ్ బాస్ కోసం తీసుకున్నారట. ఆమె ఎక్కడ ఉంటే అక్కడ సందడే అనే విషయం అందరికీ తెలుసు. తెలంగాణ యాసలో పక్కా పల్లెటూరు భాషలో మాట్లాడుతూ ఆమె చేసే రచ్చ మామూలుగా ఉండదు. ఆమె మాట్లాడటమే ఓ వినోదం. అందుకే గంగవ్వను ఎంత అంటే అంత ఇచ్చి మరీ రంగంలోకి దించుతున్నట్టు సమాచారం.
ఒకవేళ గంగవ్వే గనుక బిగ్ బాస్ షోలో అడుగు పెడితే.. బిగ్ బాస్ షోకు కొత్త కళ వస్తుంది. బిగ్ బాస్ అభిమానులకు కావాల్సిన వినోదం పండుతుంది. చూద్దాం.. గంగవ్వ బిగ్ బాస్ హౌజులోకి అడుగుపెడుతుందో? లేదో?