హైదరాబాద్, జనవరి9: తెర వేలుపు, టిడిపి స్థాపకుడు నందమూరి తారక రామారావు జీవితం ఆధారంగా తెరకెక్కిన ‘కథానాయకుడు ఎన్టిఆర్’ సినిమాను ఒక కట్టు కథగా మాజీ ముఖ్యమంత్రి నాదెండ్ల భాస్కరరావు వ్యాఖ్యానించారు. బుధవారం ఎన్టిఆర్ సినిమా విడుదలై ప్రేక్షకుల ముందుకు వచ్చింది.
ఈ సినిమా పై ఓ న్యూస్ ఛానల్తో నాదెండ్ల మాట్లాడారు. సినిమాలో కొన్ని సన్నివేశాలను తప్పుగా చిత్రించారని ఆయన చెప్పారు. తాను కాంగ్రెస్ పార్టీని తిడుతున్నట్లుగా చూపీంచారనీ, అప్పుడు తాను కాంగ్రెస్ శాసన సభ్యుడిగా ఉన్నానని గుర్తు చేశారు. భవనం వెంకట్రామ్ ప్రమాణ స్వీకారానికి తాను కాంగ్రెస్లోనే ఉన్నప్పటికీ వెళ్ళ లేదని ఆయన చెప్పారు.
అసలు తెలుగుదేశంపార్టీనీ తానే స్థాపించానని నాదెండ్ల చెప్పుకున్నారు. ఎన్టిఆర్ చైన్నై నుండి నేరుగా వచ్చి తన ఇంట్లో జరుగుతున్న పార్టీ సన్నాహక సమావేశంలో పాల్గొన్నారనీ, బయటకు వచ్చి మీడియాతో పార్టీ వ్యవహారాలు తాను చూసుకుంటానని ఆనాడు ప్రకటించారనీ ఆయన పేర్కొన్నారు. సినిమాలో వాస్తవానికి భిన్నంగా కొన్ని సీన్లు ఉన్నాయని ఆయన చెప్పారు.
నాదెండ్ల ‘ నా జీవిత ప్రస్థానం’ అనే ఆత్మకథ రాసుకున్నారు. ఆ పుస్తకంలో ఆయన సంచలనాత్మకమైన సంగతులు రాశారు.
previous post
next post