నాగబాబు.. పడి లేచిన కెరటం. అవును.. చిరంజీవి తమ్ముడిగానే కాకుండా ఆయన సొంతంగా ఎంతో కష్టపడ్డారు. నటుడిగా ప్రయత్నించారు. నిలదొక్కుకోలేకపోయారు. నిర్మాతగా మారారు. చేతులు కాల్చుకున్నారు. ఉన్న ఇంటిని కూడా అమ్ముకునే స్థితికి చేరుకున్నారు. అప్పులు మీదపడి ఆత్మహత్య చేసుకుందామనుకున్నారు. కానీ రోజులు ఎప్పుడూ ఒకేమాదిరిగా ఉండవు కదా.
ఓడలు బండ్లు అవుతుంటాయి.. బండ్లు ఓడలు అవుతుంటాయి. అలాగే నాగబాబు ప్రస్తుతం ఆర్థికంగా స్థిరపడ్డారు. నాలుగు రాళ్లు వెనకేసుకున్నారు. తన కొడుకు కూడా హీరో అయ్యాడు. ప్రస్తుతం ఎటువంటి సమస్యా లేదు.
నాగబాబు ఈ మధ్య మన చానెల్ మన ఇష్టం.. పేరుతో ఒక యూట్యూబ్ చానెల్ ను స్టార్ట్ చేసిన సంగతి తెలిసిందే. ఆ చానెల్ లో ఎప్పుడూ ఏదో ఒక వీడియో పెడుతుంటారు. తన వ్యక్తిగత విషయాలను కూడా అందులో షేర్ చేస్తుంటారు నాగబాబు.
తాజాగా కోట్లు సంపాదించడం ఎలా? అంటూ ఓ వీడియోను రూపొందించారు. దానికి సంబంధించిన ప్రోమోను కూడా ఆయన రిలీజ్ చేశారు.
మనిషికి డబ్బు చాలా ముఖ్యం. ఎన్ని పనులు ఉన్నా.. డబ్బు సంపాదించడం అనేది గ్రెటెస్ట్ పని. ప్రేమానురాగాలు.. అనుబంధాలు.. అంటూ అందరూ సొల్లు మాట్లాడుతుంటారు కానీ.. డబ్బు లేకుంటే కనీసం ఇంట్లో పెళ్లాం కూడా గౌరవం ఇవ్వదు అంటూ నాగబాబు వీడియోలో చెప్పుకొచ్చారు. ఓ ప్రముఖ క్యారెక్టర్ ఆర్టిస్ట్ వ్యక్తిగత జీవితం గురించి కూడా నాగబాబు చెప్పుకొచ్చారు.
అలాగే.. తన గురించి కూడా చెప్పారు. నేను ఒకానొక టైంలో నాకు ఎంత అప్పు ఉన్నదో చూసుకోవడానికి కూడా చాలా భయం వేసింది. మనోళ్లు ఉన్నారు కదా.. ఎలాగోలా మేనేజ్ చేస్తారులే అనుకున్నా. కానీ.. అలా అప్పులు చేసి నేను ఎంత దెబ్బతిన్నానో నాకు తెలుసు. ఒక్క పైసా సంపాదించకుండా ఇంట్లో ఊరికే కూర్చొని ఉండగలమా? అసలు బాధ్యతలను నెరవేర్చనోడిని ఎవరు పట్టించుకుంటారు. కన్న తల్లిదండ్రులు కూడా పట్టించుకోరు.. అంటూ తన గతాన్ని నెమరు వేసుకున్నారు నాగబాబు.
ప్రోమోలో ఇంకా ఆయన ఏమన్నారో మీరే చూడండి..