నాని గత సినిమాల ప్రభావం .. ప్రస్తుతం నిర్మాణంలో ఉన్న సినిమాల మీద ఏమాత్రం పడటం లేదని తాజా పరిస్థితులు.. నాని మార్కెట్ చూస్తే అర్థమవుతోంది. ఇప్పటికే నాని కి మినిమం గ్యారెంటీ హీరో అన్న పేరుంది. నాని తో సినిమా చేసిన ఏ నిర్మాత కూడా ఇప్పటి వరకు భారీగా నష్టాలను చూసింది లేదు. భారీగా లాభాలు రాకపోయినా కూడా పెట్టిన పెట్టుబడి వచ్చేస్తుంది. ఈ నమ్మకంతోనే నాని సినిమాలు యావరేజ్ అన్న టాక్ దగ్గర ఆగిపోయినా నిర్మాతలు డేట్స్ కోసం క్యూ కడుతున్నారు. వరసగా సినిమాలు చేస్తూ వస్తున్న టాలీవుడ్ హీరో అంటే అది నాని నే.
ప్రస్తుతం మూడు సినిమాలని వచ్చే ఏడాది రిలీజ్ చేసేలా ప్లాన్ చేస్తున్నాడు. ఇప్పటికే షైన్ స్క్రీన్ బ్యానర్ లో హరీష్ పెద్ది, సాహు గారపాటి కలిసి నిర్మిస్తున్న టక్ జగదీష్ కంప్లీట్ చేసే పనిలో ఉన్నాడు. నాని కి ఇంతకముందు నిన్నుకోరి లాంటి సూపర్ హిట్ ఇచ్చిన శివ నిర్వాణ ఈ సినిమాకి దర్శకత్వం వహిస్తున్నాడు. రీతువర్మ, ఐశ్వర్య రాజేష్ హీరోయిన్స్ గా నటిస్తున్నారు. ఈ సినిమా మీద నాని చాలా నమ్మకంగా ఉన్నాడు. అంతేకాదు టాక్సీవాలా దర్శకుడితో ఇటీవలే శ్యాం సింఘరాయ్ ఆన్న సినిమాని సెట్స్ మీదకి తీసుకు వచ్చాడు నేచురల్ స్టార్. సాయి పల్లవి, కృతి శెట్టి హీరోయిన్స్ గా నటిస్తుండగా కలత్తా బ్యాక్ డ్రాప్ లో ఈ సినిమా తెరకెక్కుతోంది.
కాగా వచ్చే నెల నుంచి నాని మరో విభిన్నమైన కథాంశం తో తెరకెక్కే సినిమాని సెట్స్ మీదకి తీసుకు వెళ్ళబోతున్నాడు. ‘అంటే… సుందరానికీ!’ అన్న టైటిల్ తో ఈ సినిమా తెరకెక్కబోతుండగా ‘బ్రోచేవారేవరురా’ ‘మెంటల్ మదిలో’ వంటి డిఫ్రెంట్ జనర్ సినిమాలతో హిట్ అందుకొని టాలీవుడ్ లో పాపులర్ అయిన వివేక్ ఆత్రేయ ఈ సినిమాని తెరకెక్కిస్తున్నారు. మైత్రీ మూవీస్ మేకర్స్ బ్యానర్ పై నవీన్ యెర్నేని – యలమంచిలి రవిశంకర్ నిర్మించనున్నారు.
మలయాళ బ్యూటీ నజ్రియా ఫాహద్ నాని కి జంటగా నటిస్తోంది. కాగా ఈ సినిమా మొదలవక ముందే థియేట్రికల్ – నాన్ థియేట్రికల్ రైట్స్ మొత్తం దాదాపు 50 కోట్ల కి పైగా ఆఫర్ చేస్తున్నారట. ఇంకా చర్చల దశలో ఉన్నారని తెలుస్తోంది. మొత్తానికి నాని మార్కెట్ అంతకంతా పెరుగుతూ వస్తోంది. ఇక నాని తో సినిమా తీసే నిర్మాతలకి లాభాలే లాభాలని చెప్పుకుంటున్నారు.