Breaking: నేపాల్ లోని పొఖారా అంతర్జాతీయ విమానాశ్రయానికి సమీపంలో ఘోర విమాన ప్రమాదం సంభవించింది. ఖాట్మండు నుండి కాస్కీ జిల్లాలోని పొఖారాకు బయలుదేరిన యతి ఎయిర్ లైన్స్ కు చెందిన ఏటీఆర్ 72 విమానం కుప్పకూలింది. ఆ సమయంలో విమానంలో 68 మంది ప్రయాణీకులు, నలుగురు విమాన సిబ్బంది ఉన్నారు. ప్రయాణీకుల్లో అయిదుగురు భారతీయులు, నలుగురు రష్యన్, ఇద్దరు సౌత్ కొరియా, ఒకరు ఐరిష్ దేశస్తులు ఉన్నట్లు సమాచారం. ఈ ఘటన పొఖరా ఇంటర్నేషనల్ ఎయిర్ పోర్టు, పాత ఎయిర్ పోర్టు మధ్య చోటుచేసుకుంది. ఈ విషయాన్ని యతి ఎయిర్ లైన్స్ సిబ్బంది సుదర్శన్ బర్తౌలా దృవీకరించారు.
ఈ ప్రమాదం లో ఇప్పటి వరకూ 40 మృతదేహాలను స్వాధీనం చేసుకున్నట్లు చీఫ్ డిస్ట్రిక్ట్ ఆఫీసర్ తెక్ బహదూర్ కేసి స్థానిక మీడియాకు వెల్లడించారు. విమానంలోని వారు ప్రమాదం నుండి ప్రాణాలతో బయటపడే అవకాశాలు చాలా తక్కువ అని ఆయన పేర్కొన్నారు. విమాన ప్రమాదం జరిగిన ప్రదేశంలో భారీగా మంటలు చెలరేగడంతో భధ్రతా సిబ్బందిని నియమించామని చెప్పారు. ప్రస్తుతం సహాయక చర్యలు కొనసాగుతున్నాయి. ఈ ప్రమాదం జరగడంతో పొఖరా ఎయిర్ పోర్టును తాత్కాలికంగా మూసివేశారు. అసలు ప్రమాదానికి గల కారణాలు ఏమిటి అనే దానిపై విచారణ జరుపుతున్నారు. ఈ ప్రమాదంలో విమానానికి చెందిన ఒక్క రెప్ప తప్ప మొత్తం కాలిపోయింది.
ఈ విమాన ప్రమాదంపై నేపాల్ ప్రధాని పుష్ప కమల్ దహాల్ విచారం వ్యక్తం చేశారు. అత్యవసర మంత్రి వర్గ సమావేశాన్ని ఏర్పాటు చేశారు. భద్రతా దళాలు, హోంశాఖ వెంటనే రెస్క్యూ ఆపరేషన్ చర్యలు చేపట్టాలని ఆదేశించారు.
