GST Hikes: ఈరోజుతో 2021 సంవత్సరం పూర్తవుతుంది. రేపటి నుంచి 2022 ఏడాది ప్రారంభం అవుతుంది. ఐతే నూతన సంవత్సరంలోకి స్వాగతం పలకగానే జనవరి 1 నుంచే అనేక వినియోగ వస్తువులపై కొత్త జీఎస్టీ పన్ను రేట్లు అమలు కానున్నాయి. ఈ మార్పులు కొన్ని ముఖ్య వ్యాపారాలపై ప్రభావం చూపనున్నాయి. సామాన్య ప్రజలపై మాత్రం ఈ కొత్త పన్ను రేట్లు ప్రభావం చూపవు. కానీ కన్య్సూమర్‌ గూడ్స్‌పై విధించే కొత్త జీఎస్టీ రేట్ల వల్ల సామాన్యులు కూడా కాస్త ప్రభావితం అవుతారు. అయితే జీఎస్టీ పన్ను రేట్ల మార్పుల కారణంగా జనవరి 1 నుంచి ఏయే వస్తువుల ధరలు పెరుగుతాయి? ఏయే వస్తువుల ధరలు తగ్గుతాయి? వంటి విషయాలు ఇప్పుడు చూద్దాం.
2022 జనవరి 1 నుంచి ధరలు పెరిగే వస్తువులివే..!
బట్టలు, పాదరక్షలు
జనవరి 1వ తేదీ నుంచి దుస్తులు, పాదరక్షలు వంటి వస్తువులపై 12 శాతం జీఎస్టీ కట్టాల్సి ఉంటుంది. గతంలో వీటిపై 5 శాతం మాత్రమే జీఎస్టీ రేట్లు ఉండేవి. కానీ ఇటీవల కేంద్రం 5 శాతాన్ని 12 శాతానికి పెంచేసింది. తొడుక్కునే దుస్తులు, సింథటిక్ నూలు, దుప్పట్లు, టెంట్లు, టేబుల్‌క్లాత్‌లు ఇలా వస్త్రాలతో తయారుచేసిన అన్ని వస్తువులపై 12% జీఎస్టీ కట్టాల్సి ఉంటుంది. పాదరక్షలపై కూడా 12 శాతం జీఎస్టీ చెల్లించాలి.
క్యాబ్, ఆటో రైడ్స్‌
ఓలా, ఉబర్ ద్వారా ఆన్‌లైన్‌లో బుక్ చేసుకునే ఆటో రిక్షా రైడ్‌లపై జనవరి 1 నుంచి 5% జీఎస్టీ పన్ను పడుతుంది.
స్విగ్గీ, జోమాటో
జొమాటో, స్విగ్గీ వంటి సంస్థల ద్వారా చేసే ఆర్డర్లపై 5 శాతం జీఎస్టీ చెల్లించాల్సి ఉంటుంది.
2022 జనవరి 1 నుంచి తగ్గే ధరల వస్తువులివే..!
క్యాన్సర్‌ మందులు
క్యాన్సర్‌ మందులపై 18 శాతం నుంచి ఐదు శాతానికి జీఎస్‌టీను రేట్‌ను తగ్గించింది కేంద్రం. జనవరి 1 నుంచి వీటిపై 5 శాతం జీఎస్టీ రేట్స్‌ అందుబాటులోకి వస్తాయి.
ఫోర్టిఫైడ్‌ రైస్‌ (బలవర్థకమైన బియ్యం)
ఫోర్టిఫైడ్‌ రైస్‌పై 18 శాతం నుంచి 5 శాతనికి జీఎస్టీ రేటును తగ్గించింది కేంద్రం.
బయోడీజిల్
బయోడీజిల్ ఇంధనంపై కేంద్రం విధించిన 18 శాతం జీఎస్‌టీను 5 శాతానికి తగ్గిస్తూ నిర్ణయం తీసుకుంది కేంద్ర ప్రభుత్వం.
