తెలంగాణ సీఎం కే చంద్ర‌శేఖ‌ర్ రావు, ఏపీ ముఖ్య‌మంత్రి వైఎస్ జగన్ మోహ‌న్ రెడ్డి మధ్య ఉన్న సఖ్య‌త గురించి చెప్ప‌న‌క్క‌ర్లేదు. అసెంబ్లీ ఎన్నికల నాటి నుంచి మొద‌లైన ఈ మైత్రి….అనంత‌రం కూడా కొన‌సాగింది. 
అనంత‌రం ఇరు రాష్ట్రాల మ‌ద్య స‌మ‌స్య‌లు ప‌రిష్కరించుకునే విష‌యంలోనూ ముందుకు సాగింది. అయితే, ఈ ఇద్ద‌రి మధ్య గ్యాప్ వ‌చ్చింద‌ని అంటున్నారు. దీనికి కారణం తాజాగా తెలంగాణ మంత్రి హరీశ్ రావు చేసిన వ్యాఖ్యలు.
కేంద్రంపై గుర్రుగా….
కేంద్రం తీసుకొచ్చిన విద్యుత్ సవరణ చట్టాన్ని టీఆర్ఎస్ తీవ్రంగా వ్యతిరేకిస్తోంది. కొత్త చట్టం ప్రకారం పొలంలోని ప్రతి బోరుకు మీటర్లు పెట్టాలని కేసీఆర్ అన్నారు. ఇటీవల జరిగిన తెలంగాణ అసెంబ్లీ సమావేశాలపై దీనిపై చర్చ జరిగింది. ఈ సందర్భంగా కేసీఆర్ మాట్లాడారు. కొత్త మీటర్ల కోసం రూ.700 కోట్లు అవసరం ఉంటుందని స్పష్టం చేశారు. మీటర్ రీడింగ్ తీస్తారు.. బిల్లులు ముక్కు పిండి వసూలు చేస్తారన్నారు. కేంద్రం తెచ్చే కొత్త చట్టంతో రాష్ట్రాలకు నియంత్రణ ఉండదని చెప్పుకొచ్చారు.
హరీశ్ రావు ఏమ‌న్నారంటే…
అయితే, ఈ చట్టంపై హరీశ్ రావు మ‌రింత కీలక వ్యాఖ్యలు చేశారు. దుబ్బాక ఎన్నికల ప్ర‌చారంలో ఆయన హాట్ కామెంట్లు చేశారు. ఏపీ సీఎం జ‌గ‌న్‌ను హరీశ్ రావు టార్గెట్ చేశారు. వ్యవ‌సాయ విద్యుత్ విష‌యంలో సీఎం జగన్ కేంద్రం చెప్పిన‌ట్టు ఆడుతున్నార‌ని ఆరోపించారు. జగన్ నాలుగు వేల కోట్లకు ఆశ‌ప‌డ్డార‌ని, ఆయన నిర్ణ‌యం రైతులకు ఉరివేయ‌డ‌మే“ అని హరీశ్ రావు మండిప‌డ్డారు.
బీజేపీని కూడా ఆడుకున్నారు
రైతుల మోటార్లకు మీటర్లు పెడితే కేంద్రం రూ. 2,500 కోట్లు ఇస్తామని చెప్పిందని, రైతుల క్షేమమే ముఖ్యమని భావించి ఆ ఆఫర్‌ తిరస్కరించినట్లు రాష్ట్ర ఆర్థిక శాఖ మంత్రి తన్నీరు హరీశ్ రావు తెలిపారు. టీడీపీ అధినేత చంద్రబాబు నాయుడు కూడా వ్యవసాయం దండగ అన్నాడని, రైతులకు వ్యవసాయానికి సరఫరా చేసే విద్యుత్‌కు మీటర్లు పెడతానని చెప్పిన విషయం మంత్రి గుర్తు చేశారు. రైతులను ఇబ్బంది పెట్టిన వారెవరు మనుగడ సాధించలేరని అందుకోసమే మీటర్లు పెడతామన్న చంద్రబాబును ప్రజలే ఇంటికి సాగనంపారని చెప్పారు.. అభివృద్ధిని చూడాలి. అభివృద్ధి చేసిన నాయకుడిని చూడాలని ప్రజలకు ఆయన పిలుపునిచ్చారు.
దుబ్బాక ఉప ఎన్నిక‌లే టార్గెట్
దుబ్బాక ఉప ఎన్నికల్లో బీజేపీ ఓట్లు అడగాలంటే రైతుల బోరు బావులకు మీటర్లు పెట్టేందుకు కేంద్రం పార్లమెంట్‌లో ప్రవేశపెట్టిన బిల్లును ఉపసంహరించుకోవాలని హరీశ్‌రావు డిమాండ్‌ చేశారు. ఢిల్లీలోని బీజేపీ నేతృత్వంలోగల కేంద్ర ప్రభుత్వం రైతుల బోర్లకు మీటర్లు బిగించాలంటుందని, ఈ నిర్ణయంతో దుబ్బాకలో 43,089 బోరు బావుల రైతులకు తీరని అన్యాయం జరుగుతుందన్నారు.
హరీశ్ రావు కామెంట్లు గ్యాప్ తెస్తాయా?
తెలంగాణ మంత్రి హరీశ్ రావు చేసిన వ్యాఖ్యలు ఏపీ సీఎం, తెలంగాణ ముఖ్య‌మంత్రి కేసీఆర్ మధ్య గ్యాప్ ఏర్ప‌డేందుకు కారణం అవుతాయ‌ని ప‌లువురు అంటున్నారు. కేవ‌లం త‌మ ప్రభుత్వం చేస్తున్న‌దేంటో చెప్పాల్సింది ఏంటో పోయి ఏపీ సీఎం జ‌గ‌న్‌ను విమ‌ర్శించ‌డం ఎందుక‌ని కొంద‌రు కామెంట్లు చేస్తున్నారు.
