అరిజోనా: అది అరిజోనా ఎడారి ప్రాంతం. అక్కడ చిన్నచిన్న పొదలున్నాయి. వాటి దగ్గరలో ఓ కంగారూ ఎలుక కూర్చుని ఉంది. తన ఆహారం కోసం అది చూసుకుంటోంది. అయితే, దాని పక్కనే.. ఒక పెద్ద రాటిల్స్నేక్ చుట్టలు చుట్టుకుని నక్కి ఉంది. అది కూడా మంచి ఆకలి మీదే ఉంది. అత్యంత సమీపంలోనే ఎలుక ఉండటంతో ఈ రోజుకు తన కడుపు నిండినట్లేనని ఆ పాము ఆనందపడింది. ఒక్కసారిగా శరీరాన్ని లేపి, నోరంతా బార్లా తెరిచి ఆ ఎలుకను మింగేద్దామని ప్రయత్నించింది. సాధారణంగా అయితే పాము వేగానికి ఎలుక స్వాహా అయిపోవాల్సిందే. కానీ అది అలాంటి ఇలాంటి ఎలుక కాదు.. ఒక్కసారిగా శక్తినంతా కూడదీసుకుని గాల్లోకి లేచింది. తన పదునైన పళ్లతో పాము తల మీద కొరికి, తన వెనక కాళ్లతో దాన్ని తన్నేసి ఒక్క ఉదుటన దూరంగా దూకేసింది. పాము నేలమీద పడిపోయింది, ఎలుక ఎంచక్కా తప్పించుకుని పారిపోయింది. ఇదంతా రెప్పపాటు సమయంలోనే అయిపోయింది.
దీనికి సంబంధించిన ఒక నిమిషం వీడియో ఇపుడు సోషల్ మీడియాలో చక్కర్లు కొడుతోంది. ఉత్తర అమెరికాలో ఇలాంటి ఎలుకలు కనిపిస్తాయని తెలిసినా, నింజా స్టైల్లో అవి గాల్లోకి ఎగిరి మరీ కాళ్లతో దాడి చేస్తాయని మాత్రం శాస్త్రవేత్తలకు కూడా ఇంతవరకు తెలియదు. ఇంతకుముందు కూడా కంగారూ ఎలుకలు పాములకు ఆహారం కాకుండా తప్పించుకున్నప్పుడు శాండియాగో స్టేట్ యూనివర్సిటీలో వీటి తీరుపై పరిశోధన చేస్తున్న గ్రేస్ ఫ్రేమిల్లర్, మిలాచి విట్ ఫోర్డ్ లకు ఏం జరిగిందో తెలిసేది కాదు. పాము ఎలుకలకు మధ్య పోరాటం మొత్తం కేవలం 0.7 సెకండ్లలోనే.. అంటే 700 మిల్లీ సెకండ్లలోనే ముగిసిపోయేది. కొన్నిసార్లు ఎలుకలకు పాముకాటు తగిలినా, అవి చనిపోయేవి కావు. దాంతో ఈసారి వాళ్లు హైస్పీడ్ కెమెరాలను ఉపయోగించారు. స్లోమోషన్ లో తాము రికార్డు చేసిన వీడియోను చూసినప్పుడు ఏం జరిగిందో తెలిసింది. ఒక్కసారిగా ఆ శాస్త్రవేత్తలే విస్తుపోయారు.
కంగారూ ఎలుక ఒక్కసారిగా గాల్లోకి లేచి, పాము తల మీద తన రెండు కాళ్లతో తన్నేసి దూరంగా దూకేయడం మొత్తం స్పష్టంగా వీడియోలో కనిపించింది. పాము గాల్లో తేలుతూ నేలమీద పడిపోవడం కనిపించింది గానీ, ఎలుక మాత్రం పూర్తిగా మాయమైపోయింది. ‘నింజా రాట్’ అనే పేరుతో ఆ వీడియోను శాస్త్రవేత్తలు యూట్యూబ్ లో పెట్టారు. ఎలుకలు ఇంత వేగంగా స్పందిస్తాయని తామూ ఊహించలేదన్నారు. సాధారణంగా పాములు 0.1 సెకండ్లలోనే దాడిచేస్తాయి. కానీ కంగారూ ఎలుకలు వాటికంటే వేగంగా ఉన్నాయి. కనురెప్ప మూసి తెరిచేలోగానే అంతా అయిపోయిందని విట్ ఫోర్డ్ చెప్పారు. ఈ దెబ్బకు నింజా రాట్ అభిమానులు ఒక్కసారిగా పెరిగిపోయారు.