ప్రముఖ నిర్మాతల జాబితాలో దిల్ రాజు ఒకరు. ఈ ఏడాది మే నెలలో ఆయన రెండో పెళ్లి చేసుకున్న విషయం విదితమే. కరోనా నేపథ్యంలో దేశంలో లాక్‌డౌన్ ఉండడంతో నిజామాబాద్‌లోని ఒక ఆలయంలో చాలా సింపుల్ గా తేజస్వినితో దిల్ రాజు వివాహం జరిగింది. ఈ పెళ్లి వేడుకకి చాలా తక్కువ మంది హాజరయ్యారు. ఇరు కుటుంబ సభ్యులు మాత్రమే పెళ్ళిలో కనిపించారు. వీరి పెళ్లి పెద్ద దిల్ రాజు కుమార్తె హన్షితా రెడ్డి వలన జరిగింది. ఈమె దిల్ రాజుకు ఒక్కతే కుమార్తె.
2017లో దిల్ రాజు మొదటి భార్య అయిన అనిత గుండెపోటుతో మరణించారు. ఆవిడ లేని లోటు దిల్ రాజును తీవ్రంగా కుంగదీసింది. అప్పటి వరకు దిల్ రాజుకు అన్నిటిలో తోడుగా ఉన్న అనిత సడన్ గా లేకపోవడంతో ఆయన మరింత కృంగిపోయారు. అప్పటివరకు దిల్ రాజు నిర్మించిన ప్రతి సినిమాని అనిత సమర్పించేవారు. అనిత హఠాన్మరణంతో దిల్ రాజు ఒంటరి గా మిగిలిపోయారు. తన తండ్రి ఒంటరిగా ఉండకూడదని భావించిన ఆయన కూతురు హన్షిత రెడ్డి తన తండ్రికి దగ్గరుండి రెండవ వివాహం చేశారు.
సినిమా ఇండస్ట్రీ లో నిర్మాతగానే కాకుండా డిస్ట్రిబ్యూటర్‌గా మరియు ఎగ్జిబిటర్‌గా తనదైన ముద్ర వేశారు దిల్ రాజు. ఈ రోజు దిల్ రాజు 50వ పుట్టినరోజు. ఈ సందర్భంగా దిల్ రాజు టాలీవుడ్ ప్రముఖులకు గ్రాండ్ గా పార్టీ ఇచ్చారు. ఈ నేపథ్యంలో పలువురు సెలబ్రిటీలు ఈయన బర్త్ డే పార్టీలో సందడి చేసారు. ఈ వేడుకకు నితిన్ తన భార్యతో కలిసి తొలిసారి బయటకు వచ్చారు. వారి జంట ఎంతో చూడముచ్చటగా ఉంది. ఈ వేడుకకు సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి.
