సోనూ సూద్.. అది పేరు మాత్రమే కాదు. అదో భరోసా. అదో నమ్మకం.. అదో సాయం. దేవుడు ఎక్కడో ఉండడు.. మనుషుల్లోనే ఉంటాడు అనేది అక్షరాలా సత్యం అని నిరూపించాడు సోనూసూద్. సాయానికి నిలువెత్తు నిదర్శనం సోనూ. ఆపదలో ఉన్నవారికి నేనున్నాను అంటూ ముందడుగు వేస్తారు ఆయన.
లాక్ డౌన్ సమయంలో తమ సొంతూళ్లకు వెళ్లలేక అవస్థలు పడుతున్న కూలీలను వాళ్ల సొంతూళ్లను తరలించి అందరి ప్రశంసలు పొందిన సోనూసూద్.. తన దయా గుణాన్ని అలాగే కొనసాగిస్తున్నారు. ఎవరికైనా ఏ సాయం కావాలన్నా.. సోనూ సూద్ తలుపు తడితే చాలు.. నేనున్నాను.. అంటూ ఆయన తన ఆపన్నహస్తాన్ని అందిస్తున్నారు.
ఇప్పటి వరకు ఆయన ఎంతోమందికి సాయం చేశారు. భవిష్యత్తులోనూ తనకు తోచిన సాయం చేస్తానని సోనూ మాటిచ్చారు.
సోషల్ మీడియా మొత్తం గత కొన్ని రోజులుగా సోనూ సూద్ గురించే చర్చ. ఆయన సాయం చేసే గుణాన్ని చాలామంది మెచ్చుకుంటే మరికొందరు మాత్రం రాజకీయాల్లోకి రావడానికి సోనూసూద్ చేస్తున్న స్టంట్ ఇది. రాజకీయాల్లోకి రావాలంటే ప్రజల నుంచి భారీగా మద్దతు ఉండాలి.. అందుకే సోనూ సూద్ అందరికీ సాయం చేస్తూ వార్తల్లో ఉండాలని చూస్తున్నారు.. అంటూ వచ్చిన వార్తలకు సోనూ ధీటైన జవాబు ఇచ్చారు.
నా మిషన్ ఒక్కటే… సాధ్యమైనంత మందికి సాయం చేయడం. నాకు చేతనైనంత వరకు సాయం చేయడం. నాకు తోచిన సాయం చేయడం. ఎవరికైతే అత్యవసర సాయం కావాలో వాళ్లకు సాయం చేయడానికి ముందుకు వస్తున్నాం. గత పదేళ్ల నుంచి రాజకీయాల్లో రావాలంటూ పలు పార్టీల నుంచి నాకు ఆహ్వానాలు అందాయి. కానీ.. నేను ఆసక్తి చూపలేదు. ప్రస్తుతం నాకు రాజకీయాలపై ఆసక్తి లేదు. రాజకీయాల్లోకి వెళ్లడం కోసం నేను ఈ సాయాలు చేస్తున్నాను.. అనేది నూటికి నూరు పాళ్లు తప్పు.. అబద్ధం.. అని సోనూ సూద్ వెల్లడించారు.
