ర‌ష్యాలోని సెచెనోవ్ యూనివ‌ర్సిటీలో కోవిడ్ వ్యాక్సిన్‌కు గాను చివ‌రి ద‌శ క్లినిక‌ల్ ట్ర‌య‌ల్స్ పూర్త‌య్యాయ‌నే వార్త‌లు ఒక్క‌సారిగా వైర‌ల్ అయ్యాయ‌న్న సంగ‌తి తెలిసిందే. మొద‌టి రెండు ద‌శ‌ల్లో ట్ర‌య‌ల్స్ విజ‌య‌వంతం అయ్యాయ‌ని, అందులో భాగంగానే చివ‌రి ద‌శ ట్ర‌య‌ల్స్ చేప‌ట్టార‌ని, అతి త్వ‌ర‌లోనే వ్యాక్సిన్ వ‌స్తుంద‌ని అనేక భార‌తీయ మీడియా సంస్థలు, వార్తా ప‌త్రిక‌లు, చాన‌ళ్లు, వెబ్‌సైట్లు ఈ వ్యాక్సిన్‌పై క‌థ‌నాల‌ను రాశాయి. అయితే వ్యాక్సిన్ ట్ర‌య‌ల్స్ నిజ‌మే కానీ.. అవి చివ‌రి ద‌శ ట్ర‌య‌ల్స్ కాద‌ని, కేవ‌లం మొద‌టి ట్ర‌య‌ల్స్ మాత్ర‌మే పూర్త‌య్యాయ‌ని స‌ద‌రు యూనివ‌ర్సిటీ ఈ విష‌యంపై స్ప‌ష్ట‌త‌నిచ్చింది.
కోవిడ్ 19కు తాము త‌యారు చేసిన వ్యాక్సిన్‌కు కేవ‌లం మొద‌టి ద‌శ ట్ర‌య‌ల్స్ మాత్ర‌మే పూర్త‌య్యాయ‌ని సెచెనోవ్ యూనివ‌ర్సిటీ తెలిపింది. ఇంకా ఫేజ్ 2, 3 ద‌శ‌లు పెండింగ్‌లో ఉన్న‌ట్లు వెల్ల‌డించింది. మొద‌టి ద‌శ‌లో భాగంగా వ్యాక్సిన్ తీసుకున్న వాలంటీర్ల‌ను జూలై 15, 20 తేదీల్లో డిశ్చార్జి చేస్తామ‌ని త‌రువాత రెండో ద‌శ ట్ర‌య‌ల్స్ జ‌రుగుతాయ‌ని తెలిపింది. ఇక వ్యాక్సిన్ ట్ర‌య‌ల్స్ అన్నీ పూర్త‌యి ప్ర‌జా పంపిణీకి అందుబాటులోకి వ‌చ్చేందుకు క‌నీసం ఇంకో 6 నెల‌ల స‌మ‌యం అయినా ప‌డుతుంద‌ని సైంటిస్టులు తెలిపారు. అందువ‌ల్ల డిసెంబ‌ర్ వ‌ర‌కు త‌మ వ్యాక్సిన్ అందుబాటులోకి వస్తుంద‌న్నారు.
అయితే మ‌రోవైపు ఈ విష‌యాన్ని భార‌తీయ మీడియా సంస్థలు త‌ప్పుగా అర్థం చేసుకున్నాయ‌న్నారు. త‌మ వ్యాక్సిన్ కేవ‌లం మొద‌టి ద‌శ ట్ర‌య‌ల్స్ మాత్ర‌మే పూర్త‌య్యాయ‌ని, చివ‌రి ద‌శ కాద‌ని తెలిపారు. కానీ అనేక మీడియా సంస్థలు మాత్రం ర‌ష్యా వ్యాక్సిన్ వ‌చ్చేసింద‌ని క‌థ‌నాల‌ను వండి వ‌డ్డించాయి. చివ‌ర‌కు అస‌లు విష‌యం తెలిసి నాలుక క‌రుచుకుంటున్నాయి.
కాగా ఫేజ్ 1 ట్ర‌య‌ల్స్‌లో 15 నుంచి 30 మందికి వ్యాక్సిన్ ఇచ్చి ప‌రీక్ష చేస్తారు. ర‌ష్యాలో పూర్త‌యిన ట్ర‌య‌ల్స్ ఇవే. ఫేజ్ 2లో వ్యాక్సిన్ సేఫ్టీ, స‌మ‌ర్థ‌త‌ను ప‌రీక్షిస్తారు. ఫేజ్ 3లో వాలంటీర్ల‌కు పెద్ద ఎత్తున వ్యాక్సిన్ ఇచ్చి ప‌రీక్షిస్తారు. ఫేజ్ 4లో వ్యాక్సిన్ పంపిణీకి అనుమ‌తి ఇస్తారు. ఇన్ని ద‌శ‌లు దాటాకే వ్యాక్సిన్ అందుబాటులోకి వ‌స్తుంది.
