నేడు పవన్ కళ్యాణ్ పుట్టిన రోజు సందర్భంగా ప్రపంచ వ్యాప్తంగా ఉన్న అతని అభిమానులంతా తమ అభిమాన హీరో, నాయకుడి జన్మదినాన్ని సెలబ్రేట్ చేసుకునేందుకు భారీ ఎత్తున సన్నాహాలు చేశారు. హీరోలకి వీర లెవెల్ లో డై-హార్ట్ ఫ్యాన్స్ ఉంటారు…. అయితే పవన్ కళ్యాణ్ కి ఉన్న అభిమానులు వేరు…. వారి లెక్క వేరు వారికి ఉండే తిక్క వేరు.. వారి వల్ల అతనికి వచ్చే కిక్కే వేరు.
ఫాన్స్ పవన్ కళ్యాణ్ ని ఎంత ప్రేమిస్తారో మనం అతని ఆడియో ఫంక్షన్లలో, బహిరంగసభలలో, అతని సినిమా ఆడుతున్న థియేటర్ బయట చూడవచ్చు. అయితే పవన్ తన అభిమానులను ఉద్దేశించి చాలా కేరింగ్ గా మాట్లాడే మాటలు చాలా అరుదుగా కనిపిస్తాయి. వాటిలో మచ్చుకు కొన్ని చెప్పుకుందాం….
ఒకసారి జనసేన పార్టీ మీటింగ్ లో మీడియా వారితో, రాజకీయ విశ్లేషకులతో చర్చలు జరుగుతున్నప్పుడు ఒకరు పవన్ తో ఇలా అన్నారు – “మీ అభిమానులు రోడ్డు మీద హల్ చల్ చేస్తున్నారు. బండి వేసుకొని బాగా పోకిరి గా ప్రవర్తిస్తున్నారు” అని చెబుతారు. మీరు పార్టీ పెట్టి అందరికీ విలువలను బోధిస్తూ ఉన్నప్పుడు మీ అభిమానులు వాటిని మొదట ఆచరించాలి కదా అన్నట్లు ఆయనకి ఒక ప్రశ్న ఎదురవుతుంది. దానికి పవన్ కళ్యాణ్ – “కుర్రాళ్ళు బండిని బాగా రైజ్ చేస్తే ఎక్కువ నష్టం ఉందా లేకపోతే రాజకీయ నాయకులు చేస్తున్న అక్రమాలు దోపిడీలు వల్ల రాష్ట్రానికి ఎక్కువ నష్టం ఉందా?” అని ప్రశ్నిస్తాడు. ముందు ఎలాంటి వాటిని భూతద్దంలో పెట్టి చూడాలి అన్న విషయం పై ఒక అవగాహన ఉండాలని తన అభిమానులను కంట్రోల్లో పెట్టుకోవడం తనకు తెలుసునని… వారికి ఒక మాట చెప్తే చాలు వారు వింటారని పవన్ కళ్యాణ్ చెప్పడం ఇక్కడ విశేషం.
మరొకసారి బహిరంగ సభలో ఎవరో అభిమానులు అతన్ని తనివితీరా చూసేందుకు కు పోల్స్ పైకి ఎక్కుతుండగా…. పవన్ స్టేజిపై నుండి వారిని వారించి కిందకి దింపి వేశాడు. అలా చేస్తే ప్రమాదమని…. మీకు చిన్న దెబ్బ తగిలినా నాకు కన్నీళ్లు వస్తాయని పవన్ కళ్యాణ్ అనడం గమనార్హం. ఎంతోమంది అభిమానులు అతనిని చూసినప్పుడు ఆనందం తట్టుకోలేక ఆనంద భాష్పాలు కురిపించడం చూశాము. ఇలా పవన్ కూడా వారి అభిమానాన్ని తట్టుకోలేక అప్పుడప్పుడు స్టేజీపైనే ఆనందంతో కన్నీళ్లు కార్చిన సందర్భాలు కూడా ఉన్నాయి.
ఇక అజ్ఞాతవాసి ప్రీ రిలీజ్ ఈవెంట్ లో ప్రముఖ దర్శకుడు త్రివిక్రమ్ శ్రీనివాస్ మాట్లాడుతూ… “మీరందరూ ఇల్లు కి వెళ్లేముందు నాకు ఒక ప్రామిస్ చేయాలి. మీరంతా క్షేమంగా వెళ్తారని ప్రమాణం చేయండి” అంటాడు. మీరు నాకు ప్రామిస్ చేస్తే పవన్ కళ్యాణ్ ఎంతో సంతోషిస్తారని…. ఎందుకంటే మీ గురించి అందరి కన్నా ఎక్కువ బాధ్యత తనకే ఉందని…. అతను మీకు ఏమైనా చిన్న ఆపద కలిగినా అస్సలు తట్టుకోలేరని అన్నారు. త్రివిక్రమ్ శ్రీనివాస్ మితభాషి. అయినా పవన్ కళ్యాణ్ లోపల మనస్తత్వాన్ని అతను అర్థం చేసుకున్నట్లు ఎవరూ అర్థం చేసుకోలేరేమో. అతను మాట్లాడు మాట్లాడుతుంటే పవన్ చేతులు కట్టుకుని నిలబడడం చూస్తుంటే ఏ అభిమానికైనా నా కళ్ళలో నీళ్ళు తిరుగుతాయి.
ఇక తన పుట్టినరోజు నాడు ఇలా ముగ్గురు అభిమానులు చనిపోవడం మాత్రం పవన్ కు తీవ్రమైన దిగ్భ్రాంతి కలిగించే విషయం. అతనికి వారి మీద ఉన్న అపారమైన ప్రేమకు ఇది అతను అనుభవిస్తున్న శిక్ష అని చెప్పుకోవాలా? అభిమానులు ఇకనైనా తమ తల్లిదండ్రుల కోసం తమను విపరీతంగా ప్రేమించే తమ నాయకుడి కోసం అయినా ఇటువంటి రిస్కులు మానుకుంటే మంచిది.
