పవర్ స్టార్ పవన్ కళ్యాణ్ హీరోగా నటిస్తున్న తన 26 వ చిత్రం వకీల్ సాబ్ చిత్రీకరణ పూర్తి అయిపోయింది. వేణు శ్రీరామ్ దర్శకత్వంలో దిల్ రాజు కపూర్, బోనీ కపూర్ సంయుక్తంగా నిర్మిస్తున్న ఈ చిత్రం ఒక కోర్టు రూమ్ డ్రామాగా తెరకెక్కింది. హిందీలో అవార్డు విన్నింగ్ ఫిలిం ‘పింక్’ సినిమాకు ఇది రీమేక్ కావడం గమనార్హం.
ఈ చిత్రంలో పవన్ కళ్యాణ్ తో పాటు అంజలి, నివేదాథామస్, అనన్య నగల్ల, ప్రకాష్ రాజ్ తదితర తారాగణం నటించారు. రాజకీయాల్లో తన పూర్తి స్థాయి సమయాన్ని కేటాయించిన పవన్ రెండు సంవత్సరాల తర్వాత ఈ చిత్రం ద్వారా మళ్లీ ప్రేక్షకులకు కనిపించబోతున్నారు. నిజానికి ఈ చిత్రం ఈ సంవత్సరమే విడుదల కావాల్సి ఉంది కానీ కరోనా వల్ల షూటింగ్ పోస్ట్ పోన్ అవుతూ వస్తోంది.
తమన్ సంగీతం అందిస్తున్న ఈ చిత్రంలో ఇప్పటికే ‘మగువా మగువా’ పాట సూపర్ డూపర్ హిట్ అయింది. హిందీలో ఒరిజినల్ చిత్రంలో అమితాబ్ బచ్చన్ ప్రధాన పాత్ర పోషించగా…. తమిళంలో రీమేక్ లో అజిత్ హీరో పాత్ర వహించాడు. తెలుగు నేటివిటీకి తగ్గట్టు స్క్రిప్ట్లో మార్పులు చేసినట్లు తెలుస్తోంది.
ఈ చిత్రంలో శృతి హాసన్ కూడా స్పెషల్ క్యారెక్టర్ చేసిందన్న వార్తలు వస్తున్నాయి. అనసూయ భరద్వాజ్, ముఖేష్ రిషి, సుబ్బరాజు వంటి క్యారెక్టర్ ఆర్టిస్టులు కూడా ఈ సినిమాలో ఉన్నారు.