Petrol Diesel Prices: దేశ వ్యాప్తంగా పెట్రోల్ ధరలు భగ్గుమంటున్నాయి. పెట్రోల్, డీజిల్ ధరలు మంగళవారం (మార్చి 29) మరో సారి పెరిగాయి. ఆయిల్ కంపెనీలు వాహనదారులకు షాక్ ల మీద షాక్ లు ఇస్తూనే ఉన్నాయి. వరుసగా ఎనిమిది రోజుల్లో పెట్రోల్ ధరలు పెరగడం ఇది ఏడో సారి. చమురు సంస్థలు లీటర్ పెట్రోల్ పై 90పైసలు, డీజిల్ పై 76 పైసలు చొప్పున పెంచాయి. తాజా పెంపుతో హైదరాబాద్ లో లీటర్ పెట్రోల్ ధర రూ.115.61 లు కాగా, డీజిల్ ధర రూ.99.83లు గా ఉంది. విజయవాడలో పెట్రోల్ లీటర్ రూ.115.37లు, డీజిల్ రూ.101.23లుగా ఉంది. దేశ రాజధాని ఢిల్లీలో లీటర్ పెట్రోల్ ధర రూ.100.21లు, డీజిల్ ధర రూ.91.47లు, ముంబాయిలో పెట్రోల్ రూ.115.04, డీజిల్ రూ.99.25, చెన్నై లో లీటర్ పెట్రోల్ ధర రూ.105.94, డీజిల్ ధర రూ.96, కోల్‌కతాలో లీటర్ పెట్రోల్ రూ.109.68, డీజిల్ ధర రూ.94.62లుగా ఉంది. రష్యా – ఉక్రెయిన్ యుద్ధం నేపథ్యంలో అంతర్జాతీయంగా ముడి చమురు ధరలు ఇటీవల పైకి, కిందకు కదులుతున్నాయి. ఈ ప్రభావం దేశీయంగా పెట్రోల్, డీజిల్ పైన ఉంటోంది.
Petrol Diesel Prices: ధరల పెరుగుదలపై పార్లమెంట్ లో చర్చించాలి
పెట్రోల్ డీజిల్ ధరలు ప్రతి రోజూ మారుతాయి. ఉదయం 6 గంటలకు సవరిస్తుంటారు. మరో పక్క ఇంధన ధరల పెంపును ఉపసంహరించుకోవాలని, ఈ అంశంపై ప్రధాన మంత్రి మోడీ పార్లమెంట్ లో ప్రకటన చేయాలని విపక్షాలు నిన్న డిమాండ్ చేశాయి. ధరల పెరుగుదలకు రష్యా – ఉక్రెయిన్ యుద్ధమే కారణమని ప్రభుత్వం చెబుతున్న వాదనలను విపక్షాలు తోసిపుచ్చాయి. జీరో అవర్ లో లోక్ సభలో కాంగ్రెస్, డీఎంకే, టీఎంసీ ఎంపీలు పెట్రోల్ ధరలపై మాట్లాడారు. ధరల పెరుగుదలతో సాధారణ ప్రజలు, వేతన జీవులు తీవ్రంగా ఇబ్బందిపడుతున్నారని అన్నారు. ధరల పెరుగుదలపై పార్లమెంట్ లో చర్చించాలనీ, దీనిపై ప్రధాన మంత్రి సమాధానం చెప్పాలని డిమాండ్ చేస్తున్నారు.
