భారత్ లో 5 జీ సేవలు శనివారం మొదలైయ్యాయి. నాల్గవ పారిశ్రామిక విప్లవంగా భావిస్తున్న 5 జీ సేవలను ప్రధాన మంత్రి నరేంద్ర మోడీ లాంఛనంగా ప్రారంభించారు. నేటి నుండి దేశంలోని ప్రధాన నగరాల్లో 5 జీ సేవలు అందుబాటులోకి రానున్నాయి. ఆరో విడత ఇండియా ఇండియా మొబైల్ కాంగ్రెస్ (ఐఎంసీ) లో కార్యక్రమం జరుగుతున్న ఢిల్లీలోని ప్రగతి మైదానంలో ఈ ప్రారంభోత్సవ కార్యక్రమం జరిగింది. ఇండియా మొబైల్ కాంగ్రెస్ ఈ నెల 4వ తేదీ వరకూ కొనసాగుతుంది. ఈ ఎగ్జిబిషన్ ను డిపార్ట్ మెంట్ ఆఫ్ టెలికం (డాట్), సెల్యులార్ ఆపరేటర్స్ అసోసియేషన్ ఆఫ్ ఇండియా (సీఓఏఐ) లు సంయుక్తంగా నిర్వహిస్తున్నాయి.
ప్రస్తుతం నిర్దేశిత నగారాల్లోనే 5 జీ సేవలు అందుబాటులోకి రానున్నట్లు ప్రభుత్వ వర్గాలు తెలిపాయి, వచ్చే రెండు సంవత్సరాల్లో మొత్తం దేశ వ్యాపితంగా 5 జీ సేవలను విస్తరించనున్నట్లు పేర్కొన్నాయి. రియలన్స్ జీయో, ఎయిర్ టెల్, వీఐ ద్వారా 5 జీ సేవలు ఢిల్లీ, ముంబై సహా ఏడు నగరాల్లో అందుబాటులోకి వస్తాయని అధికారులు తెలిపారు. అయితే అందుకు కొంత సమయం పట్టే అవకాశం ఉంది. రియలన్స్ జీయో ఇప్పటికే జీయో 5 జీ సర్వీసును దశవారిగా అందించాలని తమ వార్షిక సర్వసభ్య సమావేశంలో నిర్ణయించింది. ఈ దీపావళి నాటికి నాలుగు ప్రధాన నగరాలైన ఢిల్లీ,. కోల్ కతా, చెనై, ముంబై లో 5 జీ సేవలను ప్రారంభించాలని లక్ష్యంగా పెట్టుకుంది.
తొలుత ప్రధాన మంత్రి నరేంద్ర మోడీ ఎగ్జిబిషన్ లోని స్టాల్స్ ను పరిశీలించారు. అక్కడి స్టాళ్లలో కలియతిరిగారు. జీయో, ఎయిర్ టెల్, సహా పలు సంస్థల 5 జీ ఉత్పత్తులను వీక్షించారు. ఆయా కంపెనీల ప్రతినిధులు తమ ఉత్పత్తుల గురించి మోడీకి వివరించారు. ప్రత్యేక కళ్లద్దాలు ధరించి వీడియోలు వీక్షించారు. ఓ స్టాల్ లో వీడియో గేమ్ సైతం ఆడారు మోడీ.
