Fire Accident: నిజంగా వాళ్లంతా అదృష్టవంతులు. సామాన్లు అగ్నికి ఆహుతి అయినా ఫరవాలేదు. ప్రాణాలతో బయటపడ్డారు. అదే పదివేలు. నాగ్ పూర్ – హైదరాబాద్ జాతీయ రహదారిపై నిర్మల్ జిల్లా గంజాల్ టోల్ ప్లాజా వద్ద ఘోర బస్సు ప్రమాదం సంభవించింది. ఈ ప్రమాదంలో ఆ ప్రైవేటు బస్సు మొత్తం అగ్నికి ఆహుతి అయ్యింది. అయితే ప్రయాణీకులు అందరూ సురక్షితంగా బయటపడటంతో అందరూ ఊపిరిపీల్చుకున్నారు.
విషయంలోకి వెళితే… నాగ్‌పూర్‌ నుంచి హైదరాబాద్ వస్తున్న ఓ ప్రైవేటు ట్రావెల్స్ బస్సులో మంటలు చెలరేగాయి. ఇంజన్ నుండి పొగలు వస్తుండటాన్ని గమనించిన డ్రైవర్ బస్సును రోడ్డు పక్కకు నిలుపుదల చేసి ప్రయాణీకులను అప్రమత్తం చేశారు. దీంతో ప్రయాణీకులు అందరూ బస్సు దిగారు. ప్రయాణీకులు తమ లగేజీని బయటకు తీసుకునే లోపుగానే బస్సు మొత్తానికి మంటలు వ్యాపించాయి. బస్సు దగ్ధమైంది. ప్రమాదం జరిగిన సమయంలో 29 మంది ప్రయాణికులు బస్సులో ఉన్నారు. విషయం తెలిసిన వెంటనే పోలీస్, ఫైర్ సిబ్బంది అక్కడకు చేరుకుని మంటలు అదుపుచేశారు. ప్రయాణీకులు సురక్షితంగా బయటపడటంతో అందరూ ఊపిరిపీల్చుకున్నారు.
