“బాహుబలి” వంటి భారీ బ్లాక్ బస్టర్ తర్వాత రాజమౌళి దర్శకత్వంలో తెరకెక్కుతున్న సినిమా RRR. యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ కలసి నటిస్తున్న మొట్టమొదటి సినిమా కావడంతో పాటు దక్షిణాదిలో ఈ సినిమా అతి పెద్ద భారీ మల్టీస్టారర్ గా పేరు తెచ్చుకోవడంతో సినిమాపై అంచనాలు ఓ రేంజ్ లో ఉన్నాయి. ఇదిలా ఉండగా ఈ సినిమాలో అల్లూరి సీతారామరాజు పాత్రలో రామ్ చరణ్ నటిస్తున్న వీడియో విడుదల చేసి లాక్ డౌన్ సమయంలో రాజమౌళి ప్రేక్షకులను ఎంతగానో అలరించిన సంగతి తెలిసిందే.
అయితే మే నెలలో ఎన్టీఆర్ పుట్టిన రోజు కావటంతో ఆ సమయంలో సినిమాలో కొమురంభీం పాత్రలో నటించే ఎన్టీఆర్ క్యారెక్టర్ వీడియో కూడా రిలీజ్ చేస్తారని మాట ఇచ్చి చివరిలో టెక్నికల్ ప్రాబ్లం వల్ల విడుదల చేయలేక పోతున్నట్లు క్లారిటీ ఇచ్చారు. దీంతో నందమూరి అభిమానులు ఎంతగానో నిరుత్సాహం చెందారు. అయితే వారి ఆకలి తీర్చడానికి “ఆర్ఆర్ఆర్” సినిమా యూనిట్ లేటెస్ట్ గా ముహూర్తం ఫిక్స్ చేసింది.
కరోనా కారణంగా గత ఏడు నెలలుగా నిలిచిపోయిన ఈ సినిమా షూటింగ్ ఇటీవల ప్రారంభమై చాలా శరవేగంగా సాగుతోంది. అయితే తాజాగా ఎన్టీఆర్ కి సంబంధించిన కొమరం భీమ్ క్యారెక్టర్ వీడియో ఈనెల 22వ తారీఖున ఉదయం 11 గంటలకు రిలీజ్ చేస్తున్నట్లు సినిమా యూనిట్ స్పష్టం చేసింది. తెలుగు తమిళం, హిందీ, కన్నడ, మలయాళ భాషల్లో రామరాజు ఫర్ భీమ్ వీడియో రిలీజ్ చేస్తున్నట్లు సోషల్ మీడియా ద్వారా వెల్లడించింది. దీంతో ఈ వార్త తెలుసుకుని నందమూరి అభిమానులు ఫుల్ హ్యాపీగా ఉన్నారు.