Samantha : సమంత.. ప్రస్తుతం టాలీవుడ్లో మోస్ట్ వాంటెడ్ యాక్ట్రెస్ గా అవతరించింది అనడంలో ఎంతమాత్రమూ అతిశయోక్తి లేదు. ఇంతితై.. వటుడింతై.. అన్నట్టు విడాకుల అనంతరం సామ్ ఎదుగుదల చాలా స్పష్టంగా మనకు కనిపిస్తోంది. ఓ వైపు హీరోయిన్ గా, మరోవైపు ఐటెం పాటలకు స్టెప్పులేస్తూ, ఇంకోవైపు కొత్త కొత్త వ్యాపారాలకు బ్రాండ్ అంబాసిడర్ గా తన సత్తా ఏపాటిదో చెప్పకనే చెబుతోంది. తాజాగా ఓ క్రిప్టో కరెన్సీకి సమంత ప్రచారకర్తగా మారిన సంగతి అందరికీ తెలిసినదే.
Samantha : సమంత విస్తరిస్తోన్న వ్యాపారం ఇదే..
సరిగ్గా ఓ 2 సంవత్సరాల క్రితం సమంత తన స్నేహితురాలు అయినటువంటి సుశృతితో సాకీ అనే ఫ్యాషన్ షోరూమ్ ప్రారంభించిన విషయం అందరికీ విదితమే. ప్రస్తుతం ఈ వ్యాపారం మూడు పువ్వులు ఆరు కాయలుగా వర్ధిల్లుతోంది. అనతికాలంలోనే ఈ షోరూమ్ బ్రాండ్ ఇమేజ్ ను సొంతం చేసుకుంది. ఈ క్రమంలో ఈ వ్యాపారాన్ని మరింత విస్తరించాలని వారు భావిస్తున్నారు. అనుకున్నదే తడవుగా తమ కార్యాచరణను కొనసాగించే దిశగా అడుగులు వేస్తున్నారు.
సమంత నెక్స్ట్ ప్లాన్ ఇదే..
ప్రస్తుతం సాకిలో మనకు కేవలం ఆడవాళ్లకు సంబంధించిన దుస్తులు మాత్రమే లభిస్తున్నాయి. ప్రస్తుతం వస్తున్న ఆదరణను దృష్టిలో పెట్టుకొని సామ్ మరో ముందడుగు వేయడానికి తన స్నేహితురాలితో శ్రీకారం చుట్టింది. అవును… ప్రస్తుతం వారు కిడ్స్ వేర్ ని కూడా సేల్ చేసే ఐడియాలో నిమగ్నమై ఉన్నట్టు తెలుస్తోంది. ఈ సందర్భంగా వారు తాజాగా ఓ మీడియా వేదికలో ఈ విషయాన్ని బయటపెట్టడం జరిగింది.
