కరోనా ను క్యాష్ చేసుకోవాలనుకున్న అతడి కక్కుర్తి 16 నిండు ప్రాణాలను బలిగొంది. కేవలం మూడో తరగతి చదివిన అతడు ఏకంగా శానిటైజర్ తయారు చేసి మార్కెట్లోకి వదలడంతో దానిని తాగి ప్రకాశం జిల్లా కురిచేడు లో 16 మంది మరణించారు.
అతడి అజ్ఞానం అంతమందికి యమపాశం విసిరింది. ఇంకెంతో మంది బలి అయ్యే లోపు ప్రభుత్వం మేలుకొంది ఉన్నత స్థాయి విచారణ జరిపింది. చివరకు ఆ గ్యాంగును ఆంధ్రప్రదేశ్ పోలీసులు హైదరాబాదులో సోమవారం అరెస్టు చేశారు.ఈ కేసుతో సంబంధం ఉన్న ఐదుగురిని పోలీసులు అదుపులోకి తీసుకున్నారు.వీరిలో శానిటైజర్ కంపెనీ ‘పర్ఫెక్ట్’ యజమాని శ్రీనివాస్, ముడిచమురు అందించిన ఇద్దరు మార్వాడీలు, మరో ఇద్దరు డిస్ట్రిబ్యూటర్లు ఉన్నారు. ప్రస్తుతం వీరు కురిచేడు పోలీసుల అదుపులో ఉన్నారు.
పోలీసు విచారణలో ఈ కేసుకు సంబంధించిన అనేక ఆసక్తికరమైన విషయాలు వెలుగు చూశాయి. . పోలీస్ వర్గాల సమాచారం ప్రకారం శానిటైజర్ కంపెనీ యజమాని శ్రీనివాస్ కేవలం మూడో తరగతి వరకు మాత్రమే చదువుకున్నాడు. తొలుత ఒక కిరాణా షాపులో పని చేశాడు.ఆ తర్వాత పర్ఫెక్ట్ కిరాణా మర్చెంట్స్ పేరుతో ఒక దుకాణాన్ని నిర్వహించాడు. లాక్ డౌన్ సమయంలో శానిటైజర్లు, మాస్కులను విక్రయించాడు.
వ్యాపారం బాగుండటంతో… సొంతంగా శానిటైజర్ల తయారీని ప్రారంభించాడు. దీనికి ప్రభుత్వ పరంగా ఎలాంటి అనుమతులుకు కూడా లేవు.పర్ఫెక్ట్ శానిటైజర్ పేరుతో తయారీని మొదలెట్టాడు.అయితే, శానిటైజర్ తయారీలో వాడాల్సిన ఇథైల్ ఆల్కహాల్ బదులు మిథైల్ క్లోరైడ్ ను వాడటం అతను చేసిన పెద్ద తప్పు.జనాలు ప్రాణాలు కోల్పోవడానికి ఇదే కారణమనని పోలీసులు నిర్ధారించారు.అయితే గుడ్డిలో మెల్ల అన్నట్లు ఈ శానిటైజర్ ను అతను కేవలం కురిచేడు ప్రాంతంలోనే అమ్మాడు.ఒక డిస్ట్రిబ్యూటర్ మెడికల్ షాపులకు ఈ శానిటైజర్లు పంపిణీ చేసినట్టు విచారణలో తెలిసింది. ప్రస్తుతం అతని కోసం పోలీసులు గాలిస్తున్నారు. తీగలాగితే డొంక కదిలింది ఇంకా ఎన్ని విషయాలు బయటకు వస్తాయో చూడాలి
