ఏపి రాజధాని అమరావతి కేసును మెన్షన్ లిస్ట్ లో చేర్చాలని రాష్ట్ర ప్రభుత్వం సుప్రీం కోర్టు రిజిస్టార్ కు లేఖ రాసిన సంగతి తెలిసిందే. ఈ నెల 6వ తేదీ (సోమవారం) మెన్షన్ లిస్ట్ లో చేర్చాలని ప్రభుత్వం తరపున ఏజీ సుప్రీం కోర్టుకు లేఖ రాశారు. అయితే ఈ రోజు సుప్రీం కోర్టు మెన్షన్ లిస్ట్ లో ఈ కేసు లేకపోవడంతో.. సోమవారం జస్టిస్ జోసెఫ్ ధర్మాసనం వద్ద ప్రభుత్వం తరపు న్యాయవాది నిరంజన్ రెడ్డి ప్రత్యేకంగా ప్రస్థావించారు. ఏపీ సర్కార్ దాఖలు చేసిన ఎస్ఎల్పీని త్వరితగతిన విచారించాలని కోరారు. ఈ నేపథ్యంలో రైతుల తరపు న్యాయవాదులు తమకు కోర్టు నోటీసులు జనవరి 27న అందాయనీ, కౌంటర్ దాఖలునకు కనీసం రెండు వారాల సమయం ఇవ్వాలని కోరారు. రైతుల తరుపున న్యాయవాదుల విజ్ఞప్తిని పరిగణలోకి తీసుకున్న జస్టిస్ జోసెఫ్, జస్టిస్ నాగరత్నం తో కూడిన ధర్మాసనం.. ఈ నెల (ఫిబ్రవరి) 23న విచారణకు తీసుకుంటామని తెలిపింది.
మూడు రాజధానులపై ఏపి హైకోర్టు తీర్పును ప్రభుత్వం సుప్రీం కోర్టులో సవాల్ చేసిన సంగతి తెలిసిందే. హైకోర్టు తీర్పును అమలు చేయడం సాధ్యం కాదని ఏపి ప్రభుత్వం .. సుప్రీం కోర్టుకు తెలియజేసింది. ఈ క్రమంలోనే హైకోర్టు తీర్పుపై స్టే విధించాలని కోరుతోంది. రాష్ట్ర ప్రభుత్వానికి రాజధానిపై మరో సారి చట్టం చేసే అధికారం లేదని రాష్ట్ర హైకోర్టు త్రిసభ్య ధర్మాసనం తన తీర్పులో చెప్పడం ద్వారా ప్రభుత్వ అధికారాల్లో కోర్టు జోక్యం చేసుకున్నదని రాష్ట్ర ప్రభుత్వం చెబుతోంది.
