నా ఫ్యాన్సే నా బలం.. అని ఒక సినీనటుడు అనొచ్చు. నా కులమే నా బలం అని కులసంఘాల నాయకులు అనొచ్చు. నా పార్టీనే నాకు బలం అని ఒకపార్టీ నాయకుడు అనొచ్చు. నా ప్రాంతమే నాకు బలం అని ప్రాంతీయ రాజకీయాలు చేసే వ్యక్తులు అనొచ్చు. ఇవన్నీ ఒకెత్తు అయితే… అసలు వీటిలో రఘురామకృష్ణం రాజుది ఏ బలం అనే టాపిక్ మరీ మారుమ్రోగిపోతోంది. “నాకు నేనే బలం” అని పైకి మీడియాలో ఆయన అనొచ్చు కానీ… ఆ బలం వెనక “నేనే” అనే వెనక ఉన్న పెద్ద తలకాయ ఎవరబ్బా అనే చర్చ రోజు రోజుకీ తీవ్రమవుతోంది. తాజాగా ఆయన మాటలు ఈ చర్చను మరింతగా పెంచేస్తున్నాయి.
వివరాళ్లోకి వెళ్తే… తాజాగా లోక్ సభలో వైకాపా ఎంపీల సీట్ల మార్పిడి జరిగిన సంగతి తెలిసిందే. ఈ క్రమంలో ఈ విషయంపై స్పందించిన ఆర్.ఆర్.అర్… “నా సీటుని వెనక్కి నెట్టి.. నన్ను ఇంకా పెద్దవాడ్ని చేశారు. ఇకపై పార్లమెంటులో పార్టీ తరఫున మాట్లాడేందుకు నాకు సమయం దొరక్కపోవచ్చు. కానీ.. నష్టం లేదు. నాకు ఎంపీగా వున్న హక్కుల్ని, అవకాశాల్ని వినియోగించుకుంటూ మరింత సమర్థవంతంగా ప్రజా సమస్యలపై ప్రస్తావిస్తాను..” అని అన్నారు!
ఈ క్రమంలో… గత కొద్ది రోజులుగా లేఖల మీద లేఖలు రాస్తూ అధికార పార్టీకి మరింత తలనొప్పిగా మారుతున్న ఆర్.ఆర్.ఆర్. తాజాగా గోశాలల వ్యవహారంపై ముఖ్యమంత్రి వైఎస్ జగన్ మోహన్రెడ్డిపై లేఖాస్త్రం సంధించారు! ఈ క్రమంలో గత కొంతకాలంగా ఆర్.ఆర్.ఆర్. వ్యవహారాన్ని క్షుణ్ణంగా గమనిస్తున్నవారు మాత్రం… అసలు ఈయనకున్న బలం ఏమిటి.. నమ్మకం ఏమిటి అని నిన్నటివరకూ వినిపించిన మాటల స్థానే… ఈయన వెనక ఉన్న పెద్ద తలకాయ ఎవరు? అనే ప్రశ్నలు తాజాగా ఉత్పన్నమవుతున్నాయి. ఆర్.ఆర్.ఆర్. ఎప్పుడు చెబుతారో అని ఆయన అభిమానులు ఎదురుచూస్తున్నారు!!