అమరావతి, మార్చి 31: అభిమానుల హృదయాలను దోచుకోవాలని చేయి (హ్యాండ్) ఇస్తే అభిమాని ముసుగులో ఒక చోరాగ్రేసరుడు ఆ మహిళా నేత ఉంగరాన్నే దోచుకునేందుకు ప్రయత్నించిన వైనమిది. ఎన్నికల సమయంలో వివిధ పార్టీల నేతలు, కార్యకర్తలు సభలు, సమావేశాలు, రోడ్‌షోలు నిర్వహిస్తుంటే ఇదే అదునుగా కొందరు జేబు దొంగలు వారి హస్తలాఘవాన్ని ప్రదర్శిస్తున్నారు. ఈ ఘటన చూస్తే నాయకులు కూడా చాలా జాగ్రత్తగా ఉండాల్సిన పరిస్థితులు నెలకొంటున్నాయి.
విశాఖ ఎయిర్ పోర్టు లాంచ్‌లో వైసిపి అధినేత జగన్మోహనరెడ్డి వద్దకు ఒక యువకుడు అభిమానినంటూ సెల్ఫీ కోసం వచ్చి కోడికత్తితో దాడి చేసిన ఉదంతం చూశాం. ఇక్కడ అభిమాని ముసుగులో వచ్చి మహిళా నేత చేతి ఉంగరాన్నే కాజేయ్యాలని ఒక ప్రభుద్దుడు చూశాడు. నాడు సోదరుడు బాధితుడు. నేడు సోదరి బాధితురాలు అవ్వబోయింది.
వైసిపి అధినేత జగన్మోహనరెడ్డి సోదరి షర్మిల గుంటూరు జిల్లాలో ఎన్నికల ప్రచారం నిర్వహిస్తూ వాహనంలో వెళుతున్న సమయంలో అభిమానులు కరచాలనం (షేక్‌హ్యాండ్) కోసం ఎగబడుతుంటే పోనీలే వారి ఉత్సాహాన్ని ఎందుకు కాదనాలి అని వారికి కరచాలనం చేస్తూ ముందుకు సాగారు. ఇదే అదునుగా అభిమాని ముసుగులో ఒక చోరాగ్రేసరుడు షర్మిల చేతి వేలికి ఉన్న ఉంగరాన్ని లాక్కునే ప్రయత్నం చేయడంతో షర్మిల అప్రమత్తమయ్యి చేయి లాగేసుకుంది.
నేతలూ….జర జాగ్రత్త.
ఈ వీడియో సోషల్ మీడియాలో వైరల్‌ అయ్యింది.
వీడియో కోసం క్లిక్ చేయండి.
